نبدا بسم الله ونحضر الخضروات نغسلها جيدا ثم نقطعها مربعات صغيرة اما الجزر نبرشو ونحطهم في مقلاة بها م ك زيت ونحطها على نار هادئة تتقلى جيدا ثم نضيف ملح وبابريكا حلوة و زنجبيل وفلفل اسود ونقلي المزيج جيدا

نخليها تتقلى حتى تذبل ونقطع البطاطا إلى مربعات

نقلي البطاطا في زيت ساخن ثم نقلي كذلك قطعة الكفتة بعد ما كنت رحيتها وتبلتها بنفس التوابل

نرجع لخليط الفلفل والجزر بعد ماطاب نضيف عليهم البطاطا والكفتة المقليين ونضيف حبة طماطم مرحية ونخليها حتى تتشرب الطماطم ونطفي النار

نرجع نحضر العجينة في رسبسيون نحط كاس حليب دافئ مع كاس ماء دافئ وم ك خميرة الخبز وم ك سكر ونخلط جيدا ونخليها تتفاعل 10د ثم نضيف عليها 4 م ك زيت ونخلط جيدا ثم نبدا أولا باضافة كاس من طحين القمح الكامل

ثم نضيف كاس سميد ناعم ونخلط جيدا مع م ص ملح ونكمل نلم العجينة بطحين ابيض حتى نتحصل على عجينة طرية نوعا ما نغطيها بورق شفاف ونخليها تختمر مدة ربع ساعة

بعد ما اختمرت نضيف عليها م ك زبدة ونعجنها جيدا

نقسم العجينة إلى 2كرات ونحطهم على طاولة العمل نجيب ورق طباخ نحل فوق العجينة الأولى شكل مستطيل

نفرغ كمية من الحشو بعد مابرد تماما ثم نضيف عليه جبن مبشور كما يمكن إضافة جبن طري ونغلق عليه كما فالصورة

نغلق العجينة جيدا كما فالصورة ثم نشكلها بالسكين دون قطعها ونكمل الكرة الثانية بنفس الطريقة

بعد ما تركتها اختمرت مجددا ندهنها بصفار البيض ونزينها حبة البركة (سينوج) ونشعل الفرن يسخن جيدا ثم ندخل الصينية الأولى تطيب من تحت ثم نشعل عليها تتحمر من فوق ونخرجها ونخليها تبرد ونطيب الصينية الثانية بنفس الطريقة

بعد ما بردت نقطعها بسكين حاد ونخليها تبرد

فالاخير نقدم المملحات المحشية في صحن التقديم مع شربة او حساء خضار والف صحة وعافية