نضرب السكر والبيض وعليهم الفانيليا والنسكافية لغاية ما يعلى و اللون يبقى فاتح

طبعاً بياخد وقت نضرب براحتنا لغاية ما يبقى ليه قوام شويه

نضيف الدقيق المنخول شوية شوية ونقلب بالراحه بملعقة خشب او سباتيولا من فوق لتحت

نجيب صينية مدوره مقاس ٢٨ وندهنها سمنه كويس ويا سلام لو في ورقة زبدة تبقى ممتازة

نضع الخليط في الصينية وعلى الفرن على طول

الفرن يكون سخن ١٨٠درجه في الرف الاوسط لمدة ٤٥ دقيقة ومفتحش عليها غير بعد الوقت دة لو لقيتها لسة مستوتش اخليها كمان شوية واتابعها طبعاً كل فرن مختلف

اختبرها بالخله من النصف لو طلعت نضيفة يبقى كدة تمام اطفى الفرن وافتح الباب خمس دقائق وبعد كدة اطلعها

اجيب شبكة سلك واضعها فوق الصينية واقلبها بالراحة هتنزل على طول لان في ورق زبدة

اسيبها تتهوى شوية وهى متغطيه بفوطه قطن خفيفة علشان الهوا ميخليهاش تبقى زفرة

ممكن اتركها لتانى يوم في الثلاجة لسهولة تقطيها بسكينة كبيرة مشرشرة

نقطعها 3 طبقات وتبقى احلى سبونج عملناه باذن الله وبالف هنا

نعمل الكريمة نضع شوية كريمة وننزل بشوية لبن مثلج الى ان تتماسك وبعدين انزل بشوية كريمة ثاني وازود اللبن شوية شوية لغاية ما أعمل الكمية المطلوبة للتورتة دى احسن طريقة هتتحكمى في التقل بتاعها زي ما انتى عايزة

نبدأ نشيل طبقة الوجه الخفيف بتاعة الكيك لانها بتبقى فيها زفارة الببض واقلبها تبقى هي قاعدة التورتة واسقى بسيرب خفيف واضع طبقة الكريمة وشرائح الموز حسب الرغبة

بعد الانتهاء من كل الطبقات تغطى بالكريمة وتوضع في الفريزر شوية

تزين بالفواكة ويغطى الجوانب بجوز هند محمص وبالف هنا وشفا