اول حاجه بنغسل الارز وننقعه نص ساعة علشان يستوي اسرع والحبه حجمها يكبر

وبعدين بنجيب حله تيفال او سيراميك (المهم مش بيلزق الاكل فيها) و نحط الارز ونحط مياه مغلية تغطي الارز بشويه ونتركه يستوي ونقلب من فتره لتانيه علشان ميلزقش

ثم ننزل باللبن بدون ميكون مغلي هنغليه مع الارز واول ما يغلي هنلاقي الوجه بقي كريمي وعامل طبقة القشطة (الخطوه دي هتجعل الارز بلبن محتفظ بالقشطه ويبقى كريمي وكمان وشه يبقى مكرمش زي المحلات)

ثم ننزل بالسكر (ممكن نزود السكر زي ما بتحبو بس الكميةدي مظبوطه وخصوصا هنضع عليه لوتس او نوتيلا بتكون مسكره) ونقلب باستمرار علشان ميلزقش الارز

ثم بجيب طبق غويط ونذوب فيه (اللبن البودر + الكريم شانتيه + النشا) مع شويه لبن سائل او مياه ثم ننزل بيهم على الخليط ونقلب

ثم ننزل بالقشطه البلدي او العاديه بس البلدي افضل كتير وهنلاقي الخليط تقل وبقي كريم

واخر حاجه ننزل بالفانيليا البودر (بلاش الفانيليا السايله علشان في انواع بتغمق اللبن)

اول ما تأخذ غلوه كده الخليط هيبقي كريمي

ونغرف في اطباق التقديم ونتركه يبرد تمام(او ممكن ناكله ساخن او ساقع حسب ما بتحبه) ثم نزينه لما يهدي ويبرد شويه بالطريقه التقلديه زبيب وجوز هند ورشة قرفة او بطريقه المحلات بالنوتيلا وقطع بندق على الوجه او اللوتس او مربى حليب متخففه بمعلقه مياه عاديه وزينت كمان ببسكوت اللوتس على الوجه كان طعمها فوق الخيال ميكس رهيب (لو عاوزينه وشه مكرمش بنغطي الطبق وندخله الثلاجه) وبالف هنا