هتجيبى حلة وتشوحى فيها مكعبات اللحمة لحد ماتاخد لون وخدى بالك كل ما اللحمة اخدت لون كل ما النكهة بقت احلى

لما تتشوح اللحمة كلها هتبدأى تضيفى شرايح البصل وتقلبيها دقيقتين وتغطى الحلة وتهدى النار وتسيبيها حوالى 10 دقايق

هتكونى مسخنة مية وتبدأى تضيفى معلقتين مية كل 10 دقايق للحمة مش عاوزين مية كتير يادوب شقشاق مية وماتخافيش طالما انتى مهدية عليها

وعلى حسب اللحمة الى عندك هتسيبيها لحد ماتستوى ممكن تاخد ساعة او اكتر او اقل المهم فى النهاية هتلاقى طعم روعة لان اللحمة استوت وهى متكرملة مع البصل مش مسلوقة فى المية

قبل ما تقفلى هتضيفى القرفة والكبابة الصينى ودى توابل الكباب حلة بجد هتعرفى الفرق لما تاكليها وظبطى ملحك وفلفلك

سيبيى الكباب حلة على جمب وابدأى اشتغلى فى العجينة كاﻻتى وهقولك على سرى فى المعجنات المالحة

معروف ان العجين بيحتاج نصه تقريبا سوايل فانتى احسبى الدقيق ونصه هتعملى خليط من زيت الزيتون واللبن والبيض وتدفيهم على النار مش تسخنيهم خليهم دافيين فقط وتحطى المكونات الجافة على الدقيق وبراحتك ممكن تحطى البصل البودر والتوم البودر وحبة البركة او لا بس بيضيفوا طعم حلو

المهم هتحطى السوايل على الدقيق بالتدريج وتعجنى لحد ماتوصلى لعجينة لينة لا تلتصق باليد الى مش بتعجنى بيها والعجن ده هياخد منك وقت حوالى من 7 لحد 10 دقايق وتسيبيها تخمر

هتفردى العجينة وبعدين تاخدى على قد الصينية والعجينة ماتكونش تخينة ولا رفيعة اوى وتحطيها فى فرن البوتجاز من تحت على درجة 200 وتكونى فاتحة الشواية ولو مش هتعرفى تشغلى الاتنين سوا يبقى تخليها تستوى وبعدين تشغلى الشواية وماتنسيش تخرمى العجينة بالسكينة كام خرم مش كتير

الحكاية دى كلها هتاخد فى الفرن من 20 لحد 25 دقيقة

الاسرار والملاحظات بقى توابل كباب الحلة فعلا القرفة والكبابة الصينى اضافة عظيمة جدا والعجن بخليط السوايل الى كتبتهولك فوق بيديكى نتيجة هشة وطرية جدا جدا لاى معجنات مالحة وبصراحة بعتمدها فى اى معجنات مالحة هتتحشى وبعد استخدام كل انواع الدهن بصراحة زيت الزيتون بيدى طراوة مش طبيعية لاى معجنات ولما تدهنى العجينة الاخيرة ببياض البيض ده هيثبت اى حاجة هتحطيها وعلى فكرة ممكن تحطى كمان توم مفروم بصراحة روعة وبألف هنا وشفا