تاني حاجه هجيب بوله احط فيها الدقيق عليه البيكنج باودر و رشه الملح و نص معلقة كبيره سكر و اللبن البودره و ريحة الكعك و السمسم "حسب الرغبة ممكن متحطيش" هقلبهم سوا بعدين أنزل عليهم بالكوبايه إلا ربع سمنة "انا بستخدم زبدة صفرا كريستال و بسيح منها"و اقعد ابس الدقيق و السمنه سوا يعني بفركهم كدا لحد ما تبقي العجينه مرمله و شاربه من السمنة كويس والاقي مفيش دقيق ابيض كله متغطي بالسمنه

بعد كدا بحط عليهم لبن دافي انا حطيت الكوبايه إلا ربع كلها ممكن الدقيق معاكي ياخد اكتر أو أقل ف حطي شويه بشويه.. و اعجني مده متقلش عن 10 دقايق لحد ما يبقي معاكي عجينة طرية و حلوه زي كدا و لو مسكتيها تطلع علطول معاكي كدا و تقف

عبال ما العجينه تخمر هحضر العجوه انا حطيت 6 معالق كبار زبدة ف طبق و لازم زبدة عشان العجوه متنشفش بعد كدا ف الفرن و تفضل معاكي حلوة..و شغلت عليها نار هادية جدا عبال ما اقطع العجوه مكعبات عليها..هفضل بقي بعد ما قطعتها اقلب فيها لحد ما تشرب السمنه دي و أحس أنها بقت طرية كدا وشربت السمنه ههرسها كويس كل دا والنار لسه شغاله بعد ما تتهرس و تبقي تمام هسيبها تهدي ع جنب

بعد كدا هجيب ورقه زبدة و احط عليها العجوه و احط عليها ورقه زبدة من فوق كمان لو مش عندك ورق زبدة ممكن تعمليها بكيس بلاستك عادي بس العجوه مش تبقي سخنه اوي لا دافيه كدا و نفرد فيها بالنشابه و نرققها خالص عشان مش تبقي تخينه جوا العجينة أما تتلف رول

بعد ما تعدي نص الساعه هلاقي العجينه خمرت و بقت تحفه و طرية هفردها بالنشابه و اخلي سمكها تقريبا نص سم..

بعد كدا هجيب العجوه اللي فردناها و ننزلها ع العجينة بس براحه لأنها فلتت مني😂..ف اضطريت اني بعد ما قطعت مني الزقها كدا ف العجين بعدين حطيت عليهم ورق زبدة من فوق و مشيت عليها بالنشابه عشان تفردها كويس.. بعد كدا هشيل الأطراف الفاضية و اعمل العجينه ع شكل مستطيل بعد كدا هبدأ الفه رول و رول متوسط لا رفيع اوي ولا تخين اوي

بعد ما لفيته اخلي بالي و أقفل الاطراف كويس عشان متفتحش منك بعد كدا و ألفها كدا ع الرخامه عشان تمسك كويس بعد كدا هبططتها عشان لسه هتعلي منك ف الفرن ف بدل ما يبقي رول مدور لا هبطي الحته اللي ف النص و إضغطي عليها بعدين قطعيه و حطيه ف صينية مدهونه مسحه خفيفه جدا زيت أو ممكن متحطيش عشان هو اصلا فيه زبدة هو و العجوه كتير

بعد كدا هجيب كل الأطراف اللي قطعتها و هعمل منها قراقيش ساده.. هلمها دايره بعدين هفردها بالنشابه ب سمك 1سم بعدين اقطع الأطراف و اطلع شكل مستطيل بعد كدا أقسم المستطيل بالعرض و بعد كدا كل نص اقطعه قطع متوسطة بالجنب كدا لحد ما يطلع الشكل دا.. و هرصها ف صينية مش مدهونه

المقدار دا عمل صنيتين مقاس 30..عايزه تزودي ضاعفي الكمية..هتسيبي العجينه ف فرن دافي دقيقتين ع حراره 180 متغطين بفوطه لمده 5 دقايق كدا لحد ما تلمي الهيصه اللي ع الرخامه و تمسحيها😂..بعد كدا طلعيهم و شغلي الفرن ع 180 يسخن شويه ف الوقت دا هاتي المنين و ادهنيه ببيضه و فانيليا..و حطي ع وشه سمسم لو عايزة و بس دخلي كله الفرن هتقعد معاكي تقريبا ربع ساعه اول ما تلاقيها من تحت لونت و احمرت اطفي و شغلي الشوايه من فوق تاخد لون و بس كدا..و بالهنا و الشفا و جربو الطريقه دي و أن شاء الله تعجبكم💋💋❤