في إناء حطي ماء دافي مع لحظة (حليب بودرة) (حليب بودرة) وزيت البيض سكر خميرة الخبز فانيليا خلطيهم مليح وضيفي شوية قيس كاس فرينة مغربلة وجمعي وزيد مغرف صغيرة ماشي معمرة مليح تاع ملح ومن بعد ضيفي زوج كيسان تاع فرينة ونص ترجع عجينة تتلصق في اليد حطيها فوق طاولة العمل ودلكيها شوي وحد 5دقايق ورشي شوي فرينة على طاولة حتى تشوفيها التمت ورجعت عجينة الله الله تغوي هههه خليها تختمر وحد ساعة هكاك والا حطي تحتها كاسرونة ماء سخون باه تسرعي عملية الاختمار

كي تختمر قسميها على زوج يجو خبيزات صغار خليهم شوي منفخين باه كي يطيبو يجوك شابين ماترقيهمش دهنيهم بنص البيضة الى بقالك من عجينة زيدلها عطر فانيليا سائل ولاماعندكش ديريه بودرة وزيتله مغرف كبيرة حليب وخطيهم وخليهم يخمرو في صينية ولاطاجين الى راح طيبي فيه

وهي تختمر وجدي كريمة الى راح تحشيها في كاسرونة حطي الحليب وزيدي سكر والفرينة ولا نشاء حسب المتوفر عندك حركيهم مليح وحطيهم فوق نار متوسطة وبقاي تحركي بالفوي (خلاط يدوي) كي يعقاد الخليط نحيه من نار ضيفيلها عطر الفانيلا ولا اي عطر تحبيه انت كراميل ولاقهوة ولا ليمون

بعد مرور تقريبا نص ساعة حتى 45د على اختمار الخبيزات نشعلو الفرن يسخن مليح من بعد نشعلولو نار غي من تحت ودخليها طيب ماتحليش حتى تفوت 8د ومن بعد شعليلها من فوق وكفي من تحت تشوفي حمارتلك خرجيها خليها تبرد وحليها في الوسط وجيبي الكريمة ديريهالها ودهني سطح البريوش بعسل وديريلها سكر ناعم من فوق وبالصحة وراحة حبيباتي