هنبدأ بالعجينه هنحط الماء الدافئ مع الخميرة والسكر ونقلبهم ونسيبهم شويه وبعدين هنحط الزيت والملح والدقيق بالتدريج ونبدأ بقي نعجن لحد ماتكون عجينه لينه وناعمه ونغطيها ونسيبها تخمر ساعه ساعتين

هنقطع الفراخ قطع صغيرة و هنحط الفراخ مع التوابل ونقلبها هنحط معلقين الزيت في طاسة ع النار ونحط الفراخ ونقلب لحد ماتستوي ونسيبها علي الجمب

هنعمل بقي صوص الرانش هنحط المايونيز والزبادي و ملح و فلفل وبودرة توم وبودرة بصل وبقدونس وشبت ونقلبهم لحد ما يتخلطو وممكن لو طلع تقيل شويه نخففه بلبن هنسيبه ع جمب

بعد ما العجينه بقي خمرت هنبدا نفردها وبعدين هنرتبها بقي هنحط ونفرد صوص الرانش وبعدين الفراخ وبعدين الخضار اللي تحبوه ولو زيتون او فلفل مخلل بس انا حبيت طماطم مقطعه صغيرة خالص مع فلفل اخضر وبعدين بحط الجبنه الموزاريلا وبس كده

هنحطها في فرن سخن حوالي نصف ساعه ع حسب الفرن لحد مايكون لونها دهبي وحلو كده وبس كده بالف هنا وشفا يارب تكون عجبتكم واتمني تجربوها التغير حلو ياجماعه😍 واكيد مستنية رأيكم 💕