نبدا بسم الله ونحضر العجين نجيب صحن زجاجي نحط فيه كاس ماء دافي ونضيف عليه السكر وخميرة الخبز و5،م ك فرينة ونخلط مليح ونغطيها ونخليها مدة 5د ثم نضيف بياض البيضة و3م ك زيت ونخلط

نبدا باضافة اىفرينة ونصف كيس خميرة كيميائية والملح ونلم حتى نتحصل على عجينة طرية نحط عليها م ك زبدة وندخلها فيها مليح ونعجنها حوالي 3د

نلم العجينة تاعي ونخليها تختمر ونحضر الحشو نجيب مقلاة نحط فيها م ك زيت ونضيف نصف صدر دجاج مرحي ونقليه مليح ثم مضيف البصل مقطع مربعات صغار والفلفل الحلو مقطع والفلفى الحار مقطع ونضيف عليهم الملح ونحط التوابل فلفل اسود وم ص كمون وم ص زنجبيل

بعد ماتقلى الحشو مليح نضيف حبة طماطم مرحية ونقلي ونضيف نصف كاس ماء ونغطيها ونخليها تطيب مليح حتى تنشف نطفي عليها ونضيفلها زيتون اخضر مقطع ونخليها تبرد تماما

الخطوة الموالية نرجع للعجين نهبطلو الخمور ونشكلو حربوش ونقطعو الى كرات انا تحصلت على 7كرات نغطيهم ونخليهم يرتاحو10د ثم نرش طاولة العمل بالفرينة ونبدا نحل الكرة الاولى علي شكل بيضوي ثم نشكلها كيما الباركات او السفينة ونغلقها ونحطها على ورق الطهي في سينية هكا حتى نكمل كامل الكمية ونغطيهم ونخليهم يختمرو حتى يتضاعف حجمهم

ندهن الحبات تاعي بصفارالبيض ونرش عليهم سينوج او شوفان وندخلهم فرن مسخن مسبقا يطيبو من تحت ثم نشعللهم من فوق يتحمرو ونخرجهم ونخليهم يبردو تماما ونبدا نعمر نقص الحبة من النصف ونطليها بالجبن الطري

نعمر الحبات بالجبن الطري والحشو تاعي حتى نكمل كامل الحبات ونقدمهم كوجبة خفيفة للعشاء جاو هايلين وبزاااف خفاف