نبدأ بسم الله ونجيب ريسبسيون نحط فيها 2 بيض مع رشة ملح وكاس ناقص إصبع سكر ونبدا نخفق بالخلاط الكهربائي حتى يبياض الخليط ثم نضيف 2 ملعقة ك عسل وم ك زيت ونواصل الخلط مليح ثم نجيب كاس قهوة طايبة ونخلط جيداً

نبدأ باضافة الفرينة بالكاس مع 2 خميرة الحلوى ونخلط حتى نكمل 2كاس فرينة انا زدت 2 ملعقة ك فرينة وكملت الخلط حتى نتحصل على عجينة طرية نجيب صينية فرن نحط ورق الطهي فيها ونفرغ الخليط ونسويه مليح ونشعل الفرن وندخلو يطيب من تحت ثم نشعلو من فوق

بعد ماطابت نخرجها ونخليها تبرد ونقعطها الى مربعات او مستطيلات

الان نحضر صلصة الشوكولاتة نجيب كسرونة نحط فيها كاس سكر وكاس الا ربع كاكاو بني وم ص نشاء و2كاس حليب ونخلط بارد في بارد ونحطها على النار كي تحب تغلي نحط 2م ك زبدة ونواصل كي تغلي نطفي عليها النار

بعد ذلك نبدأ نغلف الحلوى تاعي نحطها في شوكة ونغطسها فالصلصة ثم نحطها في صحن فيه نواد كوكو (جوز الهند) ونرمدها مليح

بعد ماكملت كامل الكمية نحطها في صينية ونخليها تجف مليح

فالاخير نقدم حلوى الساندو او حلوى الزمن الجميل مع فطور الصباح او قهوة العصر