نبدل بسم الله ونحضر الحشو فالاول نبرش الجزر تاعي ونقطع البصل الى مربعات صغيرة ونجيب مقلاة نحط فيها زيت ونحطها عالنار نضيف البصل ونخليه يتقلى مليح ثم نضيف عليه الجزر

بعد ماتقلاو مليح نضيف ربع صدر دجاج ونحط م ص ملح وم ص فلفل اسود و م ص ثوم بودرة

نقلي الكل مليح ونخليه يطيب مليح ونرجع نحضر العجينة نجيب ريسبسيون نحط فيه كاس حليب دافئ وربع كاس ماء دافئ وم ك خميرة الخبز وم ك سكر ونخلط مليح

نضيف فالاول كاس فرينة ونخلطها مليح و نخليها تختمر حوالي 10د بعد ذلك نضيفلها ربع كاس زيت وبياض بيضة ونخلط مليح ونبدا نضيف فالفرينة تدريجيا وم ص ملح ونلم حتى نتحصل على عجينة طرية

نلم العجين ونخليه يتختمر حوالي ساعة ثم نهبطلها الخمور ونحطها على سطح العمل ونقسم العجينة الى 4كرات ونغطيهم بورق شفاف

نبدا نرش سطح العمل ونحل الكرة الاولى بالطول ثم نحط فالاول م ك جبنة طرية نطليها فالوسط ثم نحط كمية من الحشو ثم نحط من فوق جبن طري ثم جبن مبشور من فوق ثم نغلق على جنب كما فالصورة

نكمل كامل الكرات بنفس الطريقة ثم ندهنهم بصفاربيضة ونزين بمعدنوس مقطع رقيق وشرائح رقيقة فلفل حار وشرايح طماطم ونسخن الفرن ثم نحطهم يطيبو من تحت ثم نشعل لهم من فوق يتحمرو مليح

فالاخير نخرج المملحات ونغطيها بطرشونة ونخليها تبرد ثم نقطعها ونقدمها في صحن التقديم مع حساء الخضار جاو بزااااف خفاف