نبدأ بسم الله ونجيب كسرونة نحط فيها ماء ونضيف حبة بطاطا بعد ماغسلتها مليح وزهرات من الشفلور (القرنبيط) ونضيف عليهم ما ص ملح ورشة فلفل اسود ونحطهم على النار يغلي حتى يطيبو ونجيب طنجرة نحط فيها قطع دجاج ونحط عليهم بصل مرحية مع سنات ثوم والملح والتوابل والمعدنوس المقطع وم ك زيت ونحطها على النار تتقلى مليح ثم نحط ما ك طماطم مصبرة ثم نقلي مليح

بعد ماتقلى كلشي مليح نمرق بالماء ونغلق ونخلي الدجاج يطيب وبعد ماطابلي الشفلور (القرنبيط) نصفيه ونحطو في صحن ونجيب حبة بيض نخلطها مليح

نجيب مقلاة نحط فيها كمية من الزيت ونخلي يغلي ثم نحط زهرة الشفلور (القرنبيط) فالبيض ثم مباشرة في الزيت تتقلى ونجيب حبة البطاطا بعد ماطابت نقشرها ونقصها شرائح

نقلي البطاطا ايضا بعد مانغطسها فالبيض ونحطها تتقلى مع الشفلور (القرنبيط)

بعد ماقليتهم نحطهم في صحن ونفتح عالطنجرة ونحط فالمرق البطاطا والشفلور ونخليهم يغلو فالمرق حتى يثقال

فالاخير نجيب صحن تقديم نحط فيه البطاطا والشفلور وكمية من المرق ونزينها بفلفل حار وقطع الدجاج