نبدا بسم الله ونجيب نصف راس شفلور نقعطو وردات ونغسلو مليح ثم نقطع حبة بطاطا قطع

نجيب كسكاس ونحط فيه البطاطا والشفلور على جنب ونضيف عليهم الملح و نحطهم يفورو ثم نجيب مقلاة نحط فيها م ك زيت ونحطها على النار ونحط البصل يتقلى مليح ثم نضيف عليه ربع صدر دجاج مرحي ونحلو بالملعقة

نقلي اللحم مليح مع البصل ونضيف عليه الملح ورشة فلفل اسود وم ص كاري ونقليه حتى يطيب ثم نجيب 2حبات طماطم نرحيها فالاشوار بعد ماطاب الدجاج نحطو في صحن

نجيب طاجين مغربي نحط فيه م ك زيت ونحطو عالنار ثم نضيف الطماطم المرحية ونحط عليها م ك طماطم مصبرة ونقلي مليح ونحط عليه الدجاج الطايب

نخلط مليح مع الصلصة ونحط رشةفلفل اسود وراس الحانوت ونضيف كاس ماء ساخن ونغطي ونخليه يطيب بعد ماطاب الشفلور نجيب نحضر الخلطة لي نقلي فيها الشفلور نحط حبة بيض ونضيف عليها نصف كاس حليب و م ص كركم ومعدنوس مقطع و2م ك فرينة ونخلط مليح

بعد نحط زهرات الشفلور في خليط البيض والفرينة و نحطو يتقلى مباشرة فالزيت والبطاطا لي كانت فارت نضيفها على صلصة الطماطم

بعد ماقليت الشفلور نحمرو من كل الجوانب ثم نضيفو عالصلصة

نخلي البطاطا والشفلور يتشربو المرق ونحط جبن طري وجبن مبشور وفلفل حار ونغطي الطاجين ونخلي الجبن يذوب

فالاخير شكل الطاجين تاعي جاء بزاف بنين