نبدا بسم الله ونحضر المرق فالاول نجيب طنجرة نحط فيها قطعة دجاج ونضيف عليها بصل وسنات ثوم مرحيين ونحط معدنوس مقطع وملح وتابل دجاج وكركم وفلفل اسود وم ك زيت وم ص ملح ونحطها عالنار تتقلى ثم نضيف كمية من الحمص او الزيتون الاخضر

نقلي مليح ثم نمرق الطنجرة ونخليها تطيب

نرجع نرحي ربع صدر دجاج ونجيب حبة باذنجان كبيرة نغسلها مليح مع 2حبات بطاطا مقشرين ثم نقطع حبة الباذنجان

نقطع الباذنجان الى قطع صغيرة ونحطها في كسكاس تفور مع رشة ملح والبطاطا كذلك نقطعها قطع صغيرة ونحط على جنب حتى يفور الباذنجان ثم نحطها تفور حتى هيا

بعد ماطاب الباذنجان مليح نمعسو بالشوكة مليح ثم نمعس البطاطا كذلك ونخلطهم مع بعض

نضيف ربع صدر الدجاج المرحي الي البطاطا والباذنجان بعد مابردو تماما ونحطها عليهم م ص ملح و3م ك شابلير ورشة فلفل اسود وم ص تابل دجاج ونخلط مليح

نتحصل على عجينة متماسكة انا قسمتها على 2 ونجيب جبن طري نشكل كرة على سطح اليد ونحط فيها م ص جبن طري ونغلق مليح ونكورها ونحطها على جنب ونكمل بنفس الطريقة

نجيب كمية من الشابلير ونحط فيها الحبة الاولى ونرمدها مليح ونكون حطيت مقلاة بيها زيت نخليه يسخن على نار متوسطة ونبدا نحط بالحبة تتقلى

نحط كامل الحبات ونبقا نقلب من كل الجهات حتى تتحمر ونحطهم فوق ورق ماص

فالاخير نطفي عالمرق تاعي ونجيب طبق التقديم ونحط كمية المرق والحمص فالوسط وقطعة دجاج محمرة ونحط الكروكات تاع الباذنجان والدجاج

الشكل النهائي لطبق تاعي جاء بزاف بنين وخصوصا للناس لي ماتاكلش الباذنجان