في قصعه نحط كميه من الدقيق الخاص بالرقاق ونضيفلو حوتلي كاس فرينه هذا في حاله انك مكش متأكده من جوده الدقيق تاعك بعدها نجيب فنجان نحط فيه كميه الملح لي تلزم للدقيق ونضيفلو ملعقه خل وحوالي ملعقتين ماء ونخلي الملح يذوب في غرضو بعدها نرجع للدقيق تاعي ونبدا نبل فيه بالماء البارد حتى نتحصل على جينه طريه لكن متماسكه ونغطيها بكيس غذائي ونخليها ترتاح حوالي نصف ساعه

بعد نصف ساعه نكمل نعجن العجين تاعي ونضيفلو الماء بالتدريج حتى نتحصل على عجينه طريه ونكمل نعجن مليح حتى تبدا نطرطق لعجينه وتشكل فقاعات هنا نجيب الملح لي فيه ملعقه خل والماء ونصيفها بالتدريج ونعجن حتى يتجانسو مع بعض جيدا بعدها نجيب سنيوه ونرشها بالقليل من الزيت ونشكل كريات بحجم البيضه من العجين ونغطيهم بكيس ومنشفه خاصه بالمطبخ ونخليها ترتاح (هنا قد مارتاحت قد متساعدك كي تحليها)

بعد مخليت العجينه ترتاح نمر للمرق لي نسقي بيه اولا نرحي البصل مع حبه فلفل اخضر حار مي انا منرحيهمش ناعم جدا وتبقى اختياري ونفرغها في اناء بعدها نرحي الطماطم ناعم جدا ونفرغها فوق البصل ونضيف التوابل الفلفل الاحمر وعود القرفه وراس الحانوت والملح ونضيف. الطماطم المصبره حوالي ملعقه نخلط الكل جيدا ونتركه جانبا

وفي طنجره الضغط نحط مزيج بين الزبده والزيت ونخليه يسخن ونرمي عليه اللحم ونقليه جيدا بعدها نفرغ عليه نصف الخليط لي درناه البصل والطماطم والخ ونقليهم جيدا هنا اذا كان الحمص تاعك مش طايب لوحيه في المرحله هدي ونقلي جيدا ونمرق بماء يغلي ونغلق عليها حتى يطيب اللحم والحمص ونرجع للخليط نضيفلو ملعقه طماطم مصبره

وفي الاخير هدي هي الشخشوخه تاعي بعد ما وجدت هنا مسقيتهاش لانو ديناها وخرجنا كلينا برا ههه نتمنى تعجبكم وتجربوها وتنجحو فيها وبالصحه والهنا علينا وعليكم يارب ☺☺☺