اول حاجه نبدأ بيها البصل نقطع كيلو البصل حلقات رشه ملح وحوالي ٣ ملاعق كبيره دقيق ونقلبهم كويس ونفك الحلقات من بعضها وفي زيت غزير وننزله واول ما لونه يكون ذهبي نطلعه على مناديل مطبخ عشان يصفي الزيت والزيت اللي هنقلي فيه البصل مش هيترمي هتعرفو في الخطوات الجايه👉

هنسلق العدس لحد ما يستوي كويس ونصفيه من الماء الزياده وبرضو ماء العدس مش هنرميها 👌

تالت خطوه🤔 بقى هنحمر الشعيرية في شويه زيت من الزيت اللي قلينا فيه البصل بيبقا ريحته بصل وبيفرق جداً في الطعم وبعد ما الشعيرية تتحمر ويبقى لونها ذهبي هننزل بالرز ومايه العدس اللي سلقنا فيها العدس هنحطها على الرز بتديه لون حلو جداً وكمان بتخلي طعمه جميل زي كشري المطاعم واحلا

هنسلق المعكرونه بالطريقه العاديه 🙄

صلصه الكشري هنضرب الطماطم في الخلاط ونصفيها من البذر والقشر ونحطها في حله على النار تتسبك لمده عشر دقائق مع الملح والفلفل والبهارات وفي طاسه هنعمل طشه الصلصة هنأخذ شويه من الزيت اللي قلينا فيه البصل ونضيف ملعقة كبيره من الثوم ومعاها ملعقة صغيرة كزبره ناشفه لحد ما يبقى لونها ذهبي ونحطها على الصلصة المتسبكه ونحط ملعقة سكر للصلصه ومعلقه الخل ونسيبها تغلي حوالي عشر دقائق كمان

كده خلصنا البصل والمعكرونه والعدس والزر بشعيريه والصلصة كمان

كده فاضل لنا الدقه والشطه

الشطه بنأخذ ملعقة كبيره شطه حمرا ونشوحها في شويه زيت من اللي قلينا فيه البصل ونضيف عليهم كبشتين من الصلصة المتسبكه

والدقه بنأخذ شويه زيت من اللي قلينا فيه البصل ونشوح فيهم ملعقة ثوم مفروم لحد ما لونها يبقى ذهبي ونضيف عليهم ربع كوب خل ونصف كوب ماء وكمون وكزبره ناشفه وعصير الليمونه وشويه ملح وكده هنكون استخدمنا زيت البصل كله واستفدنا من طعمه وريحته في الاكل وكمان استخدمنا ماء العدس اللي بتفرق جداً في لون الرز بشعيريه وطعمه وادعولي♥️