حطي الكوكوطة فوق النار ديريلها فنجال شاي تع زيت زيدي طرف جاج اللي متوفر عندك لكن من المستحسن يكون صدر.

توجدي الخضرة مقطعة كبيرة و عشوائيا:
{حبة بصل ،حبة قرعة(كورجات)،حبة بطاطا متوسطة،3حبات زرودية متوسطين ولا 2 كبار،2سنات ثوم}حطيهم يتقلاو و ضيفي التوابل{ملح،فلفل كحل،شويييية قرفة،مغرفة صغيرة تع راس الحانوت،مغرفة عكري،2مغارف كروية،4ولا 5 حبات حلبة،مغرفة سكنجبير)
و زيدي 2 حبات طوماطيش قشريهم و نحيلهم الزريعة ڨاع.

ديري ربطة حشيش و شوية معدنوس و شوية كرافص اربطيهم بخيط و ارميها

ديري كمشة حميصة و كمشة عدسو مرقي و اغلقي عليها حتى تبدا تصفر و احسبي موراها 10 ولا 15 دقيقة و طفي عليها...نحي طرف الجاج و فتتيه و خليه على جنب،ونحي ربطة الحشاوش و اعصريها مليح مالمرقة ماترحيهمش(ارميهم فالزبل)

{انا ضفت 2 ملاعق كبار شوفان لكن الوصفة الاصلية مافيهاش و جي بنينة }ضيفي 2 مغارف كبار فرينة و 2مغارف كبار طماطم مصبرة و شوية زعفران و ارحي كلش بالبرا ميكسور و رجعيها فوق نار هادئة و ابقاي تحركي من 5 الى 10 دقائق حتى طيب الفرينة مليح ت ترجعي الجاج المفتت لداخل.

في الاخير كي طيب زيدي شوية فلفل كحل،شوية كروية،شوية سكنجبير و دوقيها على الملح و شبحيها بالحشيش مقطع و اعصري القارص كي تسقي فالبول.
بالصحة و الهنا...إحسان⁦♥️⁩