اول حاجة تبداي بيها تجهزي الشاربات تحطي السكر و تزيدي عليه الماء و تخلطيهم باردين حتى يذوب السكر في الماء و من بعد تحطيهم على نار متوسطة كي يبدأ يغلي حسبيلهم 5 دقائق و طفي و من بعد زيدي المغرف تاع العسل (نسيت ما صورتهاش السخانة و الصيام ما كنتش نخمم مليح هههه)

تبداي بسم الله تحطي الحبة تاع البيض مع الحليب و الزيت و الرشة تاع الملح و تخلطيهم بفرشيطة و لا فووي شوية حتى يتمازجو مليح من بعد تزيدي الكاس الأول تاع الفرينة و معاه الخميرة تاع الحلويات (ما يهناليش البال اذا ما غربلتش الفرينة و المواد الجافة بصفة عامة هههه) و تخلطي بمغرف

و تزيدي الكاس الثاني و تخلطي فان بمغرف (باه يدييك ما يرفدوش العجين) في الكاس الثالث دخلي يديك و النص الأخير زيديه بالتدريج حتى تتلم العجينة و ماتبقاش تتلصق في يديك و في الإناء لي تخدمي فيه و تكون طرية و عجنيها بالأصابع فوق سطح العمل

تقسمي العجينة على ثلاث أجزاء و كل جزء تقسميه على 16جزء

كل ثلث عجينة يمثل طبقة تبداي تحلي في كل جزء صغير باستعمال المايزينة (النشاء) حتى يولي قرص صغير و العجينة صدقوني هااايلة تحسبوها قطعة قماش و تحطوها على جيهة و تحلي الثانية تحطيها فوقها حتى تكملي 16جزء (ماتديروش المايزينة بين الطبقات تكفي المايزينة لي ترفدها العجينة كي تحليها)

و من بعد تحكمي هاذوك 16 جزء و تحليهم كامل مع بعض حتى تولي قرص كبير حسب السنيوة لي عندك

تدهني السنيوة بشوية زيت ثم تحطي الطبقة الأولى من العجين و تقصي الأطراف الزائدة

الحشو ديري المكسرات المحمصة و المرحية بدون إضافات فوق طبقة العجين حتى تتغطى (الكاوكاو تزايدلي من عيد الفطر و ماما ربي يحفظها تحتفظ بالكاوكاو في علبة محكمة الإغلاق و تحطها في المجمد كي نبغو نستعملوه نجبدوه نلقاوه و كأنه هذا وين حمصناه) نديرو الطبقة الثانية أي الثلث الثاني بنفس طريقة الطبقة الأولى و تحطوها فوق الحشو و نزيدو نديرو الحشو و الطبقة الثالثة و الأخيرة بنفس الطريقة و تنحو الزوائد و تقطعوها كيما تبغو (شوية التقطاع خسرلي باسكو كنت مزروبة شوية بصح الحمد لله جا مقبول)

ديري فوق كل حبة حبيبة تاع لوز و لا كاوكاو و تقدري تخليها بلا والو تخرج فان مليحة و سقيها بالزبدة الذائبة و دخليها للفور على نار قليلة 150 درجة و شعليلها من تحت حتى تفوت تقريبا ساعة شعليلها من فوق باه تتحمر

كي تخرجيها و هي سخونة شربيها بالشاربات لي تكون باردة و ديرو كامل الكمية و خلوها تتشرب على الأقل ليلة كاملة و شهية طيبة نتمنى تجربوها و رايحة تنجحلكم من أول مرة متأكدة بإذن الله و شوفو الطبقات و التوراق جاو هايلين ما شاء الله