اول حاجه نعصج اللحمة بتاعتنا ننزل بالبصل يذبل وبعد كده ننزل باللحمه وبعد كده نضيف التوابل ونفس الوقت هنضرب الطماطم في الخلاط ونصفيها بالمصفه ونسبك الصلصة واول اما يخلص الاثنين نخلطهم مع بعض وياخدو غلوه بسيطه على نار هادئه ونقفل عليهم النار

بعد كده نسلق المعكرونه ومنبردهاش بالماء علشان احنا عايزينها تلزق في بعضها علشان تبقي حتى واحده لما نيجي نقطع المعكرونه

واخر حاجه هنعمل صوص البشاميل وفي نقطه مهمه جداً ياريت نسيب حوالي معلقتين صلصة في جنب بعد اما تتسبك علشان هنضيفها على البشاميل مع الجبنة الرومي المبشوره

الطريقه السهله جداً لصوص البشاميل والغير تقليديه اللبن يكون سخن على النار ومغلي هنحطه على نار هادئه وهنعمل الرو الى هو عباره عن الدقيق مع السمنه في الاول هننزل بالسمنه وبعد كده هننزل بالدقيق على نار متوسطه في حله تانيه خالص ونبدأ ننزل خيط بسيط من الرو على اللبن على النار ونقلب بالمضرب السلك أو المعلقه واول اما احصل على القوام المطلوب هنبدأ نضيف الصلصة الى عنها في جنب وشويه من الجبنة الرومي المبشوره مش كلها علشان هنحتاج شويه الوجه وهنتبل كويس

اخر خطوه بقي فهي خطوه التجميع في الصينيه حاجه مهمه جداً أن نحط شويه من صوص البشاميل على المعكرونه ونقلبها كويس مع بعض هندهن الصينيه بسمنه وهنحط رشه من البقسماط وعليها شويه بشاميل من تحت ونفردهم بالملعقه وننزل بنصف كميه المعكرونه وبعد كده هنضيف شويه من البشاميل تاني وهفردهم كويس وهنضيف بعد كده اللحمة المفرومه بالصلصه وننزل بالكميه الباقيه من المعكرونه وعليها باقي البشاميل ونرش عليه شويه بقسماط وباقي الجبنة المبشوره

تخش الفرن وتتحمر كويس وبألف هنا وشفا