تحضير الجنواز: في إناء نحط البيض و السكر و رشة ملح نطلعهم بالباتور لمدة 10 دقائق بعدها نضيف الكاكاو و نزيد نخلط بالباتور مدة دقيقتين... من بعد نضيف كمية بيسكويت البيمو مع خمارة الحلوى و نخلط بشوية بملعقة حتى وين يتجانس الخليط و نحطو في صينية نكون حطيت عليها ورق الطهي و ندخلها للفرن.

كي طيب نقطع الجنواز تاعي على حسب الشكل لي حبيتو...(أنا درت شكل دائري)

تحضير السيرو: في كسرونة نحط 2 كيسان ماء مع كأس سكر و نحطو فوق النار مدة 15 دقيقة و نطفي عليه و نضيفلو كيس نيسكافي و نخليه يبرد شوية...

تحضير الكريمة: في إناء نحط كأس بودرة الشانتي مع كأس حليب يكون بارد مليح و نطلعهم بالباتور كي تطلع نزيد عليها علبتين دانيت و نعاود نخلط بالباتور حتى وين تطلع مليح.

بعدها نبدا نحط طبقة من الجنواز ونشربها بالسيرو من بعد نحط كمية من الكريمة ونسويها على كامل الجنواز و نبقى نحط طبقة من الجنواز و نشربها و طبقة من الكريمة حتى نكمل كامل الطبقات و طبقة الأخيرة لازم تكون من الكريمة ونخليها فالثلاجة حتى تحكم روحها مليح....

بعد ما تبرد مليح نحيها من الثلاجة و نحيلها المول و نكمل نغطيها من الأطراف بكريمة الشانتي..

بعدها التزيين إختياري.... أنا حطيت كمية من الغاناش فلبوش و بديت نحط خط فالأطراف مع نقط و نخليهم يهبطو شكل بزاف شباب كي نكمل نحط كمية من الغاناش على وجه الكيكة... بعدها حطيت الكريمة الشانتي لي فضلتلي في بوش وحطيتها على الحواف... و كملت زينت بقطع من بالسكويت وحروف بالشوكولاطة.