نضع كيلو الدقيق في بولة كبيرة ونضع السكر والملح والخميرة والبيكنج باودر والفانيليا على الدقيق ونضع البيض على الدقيق ونضع الزبدة والزيت ونضع كوب اللبن ونقوم بالعجن

نبدأ في وضع الماء.. لحد ما نحس ان العجينه بدأت تلم معانا ومبتلزقش.. لو حسينا العجينه بقت سايلة نزود دقيق وهكذا.. لحد ما تلم معانا خالص وتبقى طرية وماسكه نفسها..

نغطى البولة بالاستريتش ونحطها في فرن البوتجاز علشان تختمر او في اي مكان دافئ مش لازم الفرن المهم تختمر.. بتأخذ تقريبا من ساعة ونص لساعتين..

اول ماتبقى عالية نطلعها ونعجن مرة كمان و براحه على العجين.. ونبدأ نقطعها كور الكيلو هيعمل من ٦ ل ٧ كور.. وكل كورة منهم دى بيتزا

هنبدأ بالنشابة نفرد العجين بس الاول نحط حبة زيت مكان ما هنفرد وكمان ندهن النشابة بزيت قليل اوي ونبدأ نفرد الكورة ونحاول نحافظ على تدويرتها.. وعلى حسب الصينيه افرد العجين وكل ماتكون رقيقة بتكون احلى..

نجيب شوكة ونبدأ نمشي بالشوكة على البيتزا بعد ما فردناها في الصينية بحيث تخرمها.. نشغل الفرن في الوقت دا على درجة حرارة ٢٠٠ درجة

نحط طبقة صلصة طماطم.. وعليها شرائح طماطم وفلفل وبصل وزيتون.. وعليهم الفراخ او اللحمة او السجق او ايًا كان احنا هنعمل البيتزا بإيه المهم الحاجه دى تكون مستوية تمامًا.. وممكن لو مش حابب حاجه منهم متحطهاش.. انا عامله البيتزا اللي فوق نصين.. نص عليه طماطم ونص من غير طماطم

في الاخر نحط الجبنة الموزاريلا وباقي الجبن اللي اخترناها على الوجه وندخلهم الفرن.. من عشر دقائق لربع ساعة هتلاقى الجبن ساحت والبيتزا من تحت احمرت وبكدا نبقى خلصنا ودوق احلى بيتزا ممكن تاكلها احسن من بيتزا هات وبابا جونس وكل الكلام دا..

بالنسبة للكور انا بعمل الكمية دى كلها واقسمها كور وكل كورة الفها باستريتش واحطها في الفريزر ووقت ما احب اعمل بيتزا.. بطلع الكورة واسيبها تفك تماما واشيل الاسترتش من عليها وابدأ افردها بزيت زي الخطوات اللي فوق بالظبط.. وبتبقى كأنى لسة عجناها..

بالف هناء وشفاء ⁦❤️⁩⁦❤️⁩