#صدقة_جارية
انهاردة احنا هنعمل المناقيش يعنى مسافرين الشام ,البلاد الجميلة وناسها الطيبين. فلسطين الحبيبة لقلوبنا جميعا والقدس والمسجد الأقصى. سوريا ومدينة حماة الجميلة,لبنان وجمال شجر الأرز
الأردن ومدينة البتراء الأثرية القديمة
بس يا ترى قبل ما نتكلم عن المناقيش إيه اصل الخبز ؟وظهر امتى؟ و كان شكله إيه؟ من 800 سنة قبل الميلاد الخبز كان عبارة عن الحبوب المتوفرة فى كل دولة بيضفولها مياه ويشكلوها اقراص وتتساب فى الشمس لحد مايبان لها أصحاب ,اقصد لحد ما تجف.لكن طبعا الموضوع اختلف تماما مع الفراعنة فى مصر لأنهم اخترعوا الأفران , استخدموا حجر الرحى لطحن الحبوب وعمل الدقيق من الحبوب المختلفة سواء قمح او شعير او غيرهم ,كمان اكتشفوا الخميرة من الأعشاب البرية المتوفرة فى مصر ,يعنى نقدر نقول ان الفراعنة عملوا ثورة فى عالم الخبز وكانوا بيتعملو مع الخبز كرمز مقدس ,لانه ببساطه مصنوع من الحبوب المتوفرة على أرضنا والملح من بحرنا والخميرة واكتشفناها والمياه من النيل ,يمكن كان رمز لقوة مصروتقدمها وقتها اللى ترجع يوما ما ان شاء الله.
ما تيجوا نرجع الشام تانى ونسأل أهلها ,هى المناقيش اتسمت كدا ليه؟ فى رأيين ,ناس تقول عشان كانوا بينقشوا اطراف العجين بشكل معين عشان الحشوة ماتقعش فاتسمت مناقيش , وناس تانية تقول لا المناقيش جايه من كلمة نقش والنقش هو التلوين وبما اننا بنلون الخبز بالحشوة يعنى بننقش الخبز فجت كلمة مناقيش.أنا بحب مناقيش اللبنة اوى والزعتر ,جنى بتحب ميكس الجبن ومحمود بيحب اللحم.انتوا بتحبوا إيه؟اقولكم تعالوا نعملهم الأربعة,ان شالله ما عن حد حوش.ياللا بينا نبدء باسم الله