نخلطو البيض و السكر بالباتور حتان (حتى) يتضاعف حجمو ، منبعد نجيب الزيت نبدأ نضيف فيها تدريجيا و نخلط منبعد نزيد الحليب يكون بارد و نواصل نخلط الخليط حتان (حتى) يمتازجو المكونات.

نزيدو سكر فانيلا ، منبعد نزيدو كاس و ربع فرينة لي كنتي غربلتيها، منبعد زيدي كيس خميرة كيميائية و حركي الخليط ، و زيد مبشور الليمون و نزيد نمزج الخليط.

نجيبو المول (المول لي استعملتو هنا شكل دائري و القطر 25 سنتيمتر) و درتلو بابي كويسون و حطيت فيه الخليط و درتو في الفرن لي كنت سخنتو من قبل.

بالنسبة الكريمة الليمون ، نجيبو كسرونة نحطو فيها البيض و السكر و نخلطو مليح بالفوي ، و نزيدو نصف كأس عصير الليمون و ملعقة صغيرة مبشور الليمون و نخلطو مليح و نحطوه فوق نار هادية و نقعدو غير نحركو حتتان يبدا يخثار و يخرجو فيه فقاعات و نحوه من النار ، نجيبو صفاية و نصفوه و هو سخون ، و نزيدولو ملعقة فانيلا و نخلطو ، و نزيدو 50 غرام زبدة و نحركو حتان (حتى) تذوب و نغطيولو الورق الشفاف و لازم يلامس الورق الشفاف هاذ الكريمة و نحطوه في الثلاجة يبرد.

نجيبو الكريم شانتيه نطلعوها مع الحليب البارد مليح ، في هاذ الوقت نجيبو الكيك لي يكون طاب و برد ، نثقبوه بالكيردون و نشربوها بالسيرو لي نكونو حضرناه من قبل (نغليو كاس ماء و نص كاس سكر لمدة 10 دقائق) نشربوها ملييح ، و نديرو فوقها الكريم شانتيه و ندخلوها للمجمد و نخلوها مدة 30 دقيقة.