اولا تحضير العجينة بنجيب بولة كبيرة نحط فيها الدقيق والخميرة الفورية ورشة ملح ومعلقة السكر واللبن البودرة ونخلطهم ببعض

على النار اكون دفيت شوية ماء اعجن بهم او لبن بشرط يكون دافئ يعنى مينفعش يبقى سخن عشان ميموتش الخميرة

بعد ما الماء او اللبن بقي دافئ نحطه بالتدريج على الخليط ونعجن لحد ما العجينة تتلم لو احتاجت ماء بضيف ماء أما اذا كان الماء زائد والعجينة سائلة شوية نحط شوية دقيق عشان تتلم

بعد ما عجنا الخليط ونغطيه بورق استرتش ولو مفيش بأي كيس المهم يتغطى كويس وميدخلش هوا

نضع العجين في مكان دافي عشان يخمر انا عن نفسي بحطه في فرن البوتجاز لحد ما يخمر وقت التخمير من نص ساعة لاكتر

ثانيا عقبال ما العجين يخمر نحضر اللحمة المفرومة

في بولة تانية نضع اللحمة المفرومة وعليها ملح على حسب الحاجة وفلفل اسود ولو بتحبوا الحواوشى حار ممكن نضيف شوية شطة وقرن فلفل مولع ونقطع بقدونس وشبت بس مش كتير يعنى ممكن حزمة صغيرة من البقدونس والشبت وممكن نستغنى عن الخضرة لو مش بتحبوها

نخلطهم ببعض ونتركهم في الثلاجة لحد ما تكون عجينتنا الحلوة اتخمرت

بعد ما العجينة تختمر نبدأ نقرصها على شكل كور نحطها على الرخامة وتحط كل كورة بنحط دقيق او زيت عشان متلزقش على الرخامة

نأخذ كورة كورة ونرش دقيق في المكان اللي هعجن فيه وابدأ افرد العجين بالنشابة على شكل دائرة ونحط اللحمة المفرومة في نص الدائرة اللي فوق عشان هقفل عليها النص الباقي وبكدة هيطلعلنا على شكل انصص لو عاوزة رغيف كامل بتحطى اللحمة على العجينة كلها ونفرد عجينة تانية ونحطهم على بعض ونقفلها

بعد ما خلصنا الحشو نكون مسخنين الفرن على ١٨٠ درجة وندخله وبعدين نفتح عليه الشواية. انا عن نفسي بفتح الشواية واحط العيش ولما يتحمر ويستوى من فوق بقوم قلباه عشان الجزء التاني يستوي.. وبالهنا والشفا