الصلصة : نضع الزيت البصل ملح و فلفل اسود في مقلاة و نخليهم يتقلاو على نار هادئة من بعد ما يتقلى نضيف الطماطم و الزعيترة و الرند و نخليها حتى تطلق الماء تاعها.
من ثم نضيف الطماطم المصبرة والسكر و الماء و نخليها تتجمر شوية و نطفي عليها و نطحنها بالميكسور وتكون واجدة.

صلصة الجبن : نأخد الحليب و الجبن و نقوم بخفقهم بالميكسور ثم نديرهم في المقلاة لي تقلاة فيها الكفتة و بقى فيها رواسب و نبقى نحرك على نار هادئة حتى تثقل الصلصة و نطفي عليها.
كلما تكثرو الجبن تجي احسن و بنينة.

العجينة : نضع في اناء الفرينة و الملح و السكر و الخميرةو الزعيترة و نخلطهم شوية و نضيف الحليب و الزيت و نخلط بالملعقة و نغطيها و نخليها تخمر 15دقيقة و تكون جاهزة باش نبدو نخدموها.
ملاحظة : كيلو بنفس الكيلة لجميع المكونات من البداية

من بعد مرور 15دقيقة نجيب العجينة نضيفلها الفرينة و نبدا ندخل فيها حتى الحصول على عجينة طرية متتلاسقش بزاف فاليد.
بالنسبة للاضافات استعملت الفطر الذرة الزيتون الاخضر المقطع و الجبن المبشور.
بالنسبة للفطر : كنت طبخته في الماء مع شوية مرق دجاج.

العجينة خرجتلي 3قطع كبيرة من البيتزا. القطعة الاولى درتهم ميني بيتزا. جبت العجينة حليتها قطعتها و درتهم في الصينية كنت دهنتها بالزيت درت الصلصة و الكفتة و الفطر و الذرة و الزيتون الاخضر و صلصة الجبن و الجبن المبشور.
الفرن كنت شعلته لاعلى درجة خليت الفرن يحمى مليح ثم نقصت حتى 200درجة و خليت البيترا طيب.