نغسل العدس كويس ونحطه في حلة ونحط معاه الطماطم والبصل ونص كمية الثوم (كله سليم مش متقطع) ولو عايزين ممكن نحط معاهم (جزرة وبطاطساية) ونملا الحلة ماء ونغطيها على نار متوسطة لمدة ٣٠ دقيقة أو لحد ما العدس يظهر عليه النضج

بعد كدة نفضي الحلة في مصفاة وتحتها حلة تانية ونصفي العدس ونهرس المكونات المسلوقة في المصفاة أو ممكن نضربه في الخلاط لغاية ما ينعم ويمتزج

نحط العدس في الحلة تاني على نار هادية جداً ونحط الملح ونقلب وندوق ونتأكد أنه وصل للطعم المطلوب

طاسة هنحط فيها زيت يسخن وبعدين نقطع باقي كمية الثوم وننزلها في الزيت ونقلبه لحد ما يصفر

في ناس ممكن تفضيه على العدس لكن احيانا الزيت بيبدأ يفرقع وممكن يؤذينا فالأفضل أننا نطفي النار على الزيت ونحط عليه شوية عدس في الطاسة ونقلبهم كويس ونرجع نفضيهم في الحلة تاني ونقلب كتير لحد ما نتأكد أنه وصل للقوام المناسب وكله امتزج والطعم بقى واحد ساعتها ننزله من على النار

ونشربه دافي وممكن ناكل بيه عيش أو رز مع مخلل لفت بيبقى جميل

(خطوة اختيارية: ممكن للناس اللي بتحب العدس بشعيرية
قبل ما نحط الثوم نجيب طاسة وفيها ملعقة زيت ونحمر شوية شعيرية وبعدين نفضيهم على العدس ونسيبهم معاه للآخر) وبعد كدة نعمل خطوة الثوم عادي ونسيب كله مع بعضه لحد ما الشعيرية تستوي