الكشري بالياباني !!
الكشري من كوكب اليابان ! جيت لليابان عشان اعمل ماجستير والناس هنا منبهرة بمصر عامة...وقلت هأبهرهم اكتر واعملهم كشري ...وقد كان!!
الكشري بالياباني !!
الكشري من كوكب اليابان ! جيت لليابان عشان اعمل ماجستير والناس هنا منبهرة بمصر عامة...وقلت هأبهرهم اكتر واعملهم كشري ...وقد كان!!
الخطوات
- 1
انقع الحمص و العدس من بالليل...بس مش ازمة لو نسيت :)...الوقت من دهب!!
- 2
اسلق الحمص لمدة ساعة مع(ربع بصلة وفص توم وشوية ملح وفلفل اسود وكمون و لمسة لمون)
- 3
اسلق العدس الاسمر لمدة ساعة مع(نص بصلة وفصين توم وشوية ملح وفلفل اسود وكمون)
- 4
اسلق المكرونة وبعد ما تصفيها من المياه شوحها في شوية زيت علي نار هادية عشان ماتكلكعش ولا تعجن
- 5
صفي الحمص من مياه السلق وحافظ علي المياه ديه عشان تعمل منها الدقة
- 6
صفي العدس وحافظ علي المياه بتاعته عشان تسوي بيها الارز
- 7
في طاسة علي جنب :حمر المكرونة المكسرة (الشعرية الياباني)في شوية زيت لحد ما تاخد لون بني غامق
- 8
اغسل الارز كويس وصفيه من المياه
- 9
تجيب الrice cooker الياباني الجميل وتنزل فيه بالارز والشعرية والعدس الاسمر مع شوية ملح وفلفل اسود وتقلب كويس,وتسقي الخلطة بمياه العدس,وممكن تحتاج تزود حبة مياه عادية....وتسيب الrice cooker يعمل الواجب بتاعه :)
- 10
قطع بصلة شرايح وانزل بيها في الدقيق,واطلع بيها علي طاسة غرقانة زيت عشان تعمل احلي تقلية :)....الدقيق هيخلي البصل مقرمش اكتر...بس اوعي يتحرق منك !!
- 11
دلوقتي جه وقت الصلصة...اهم حاجة في الطبق :)....شوية زيت حلوين تشوح فيهم ربع بصلة متقطعة صغير خالص لحد ما تشم ريحة حلوة...اول ماتشم الريحة تروح نازل بالطماطم وتسيبها تغلي حبة...عقبال ماتغلي تكون قطعت 4 فصوص توم تقطيع صغير خالص وتنزل بيه في طاسة فيها شوية زيت لحد ما تشم ريحة حلوة...اول ما تشم الريحة الحلوة تروح نازل بشوية كسبرة وراهم شويتين خل وتقلب...هتلاقي الطاسة بقي لونها بني...هوب,تروح نازل بالمحتوي كله عالصلصلة اللي بتغلي مع شوية ملح وفلفل اسود وتدي الميكس ده غلوة صغيرة وتطفي...
- 12
كده معاك احلي صلصة...وفاضل الدقة بقي عشان تتسلطن وانت بتاكل :)...الدقة سهلة جدا عامة
- 13
فصين توم تقطعهم صغير او تهرسهم بالهون...بس انا في اليابان بقي ف بقطعهم صغير لانهم هنا معندهمش فكرة اساسا ايه الهون ده :))...المهم تنزل علي التوم بشوية كمون ولمون وكسبرة و شويتين خل وتقلب كويس بالشوكة وتخف الخلطة ديه بمياه الحمص شوية شوية لحد ما تبقي الدقة البريمو :)
- 14
كده معاك (الحمص-المكرونة-الارز بالعدس، التقلية، الصلصة، الدقة) تجيب طبقك الغويط الجميل وتروق نفسك بأحلي Layering technique في الدنيا :)
- 15
بالهنا والشفتشي :)....احب اشكر صاحب "قناة سنة اولي مطبخ" علي الyoutube...واقوله "احنا بنتعلم منك في الغربة يا كبير :)" https://www.youtube.com/user/sana2oulamatba5
وصفات مشابهة
-
الكشري الكشري
لا أعلم أصل لوصفة الكشري ، ولكني أعرف أنه من أشهى الأطباق التي نحبها كمصريين ، كما أنني أحب الكشري الساحلي الذي هو عبارة عن أرز مطهي ومخلوط مع عدس أصفر ، وأحب المجدرة الشامية والتي تشبه الكشري الساحلي ولكن بدلا من العدس الأصفر يستخدمون العدس البنيعموما يبقى في الصدارة بالنسبة لي طبق الكشري المصري الذي يعد من أشهى الأطباقونظرا لأن الأخت habsia تحبه فسأكتب طريقة الكشري وأتمنى أن تنال إعجابها وإعجابكم جميعا 👍👍
-
وصفات ننصحك بمشاهدتها
التعليقات (2)