منحضر حشوة اليالنجي منحط بطنجرة على النار شوية زيت زيتون ومنضيف البصل الناعم ومنقلبو شوي بعدها منضيف الرز ومنهدي النار على الآخر ومنضيف البندورة والبقدونس منقلبن تقليبتين ومنطفي النار هيك بتكون دبلت الخضرة شوي حتى ما تدبل كتير على الطبخ وترتخي حبات اليالنجي

منضيف على الحشوة ملعقة دبس البندورة +دبس الرمان+الفلفل+القهوة+الزنجبيل والملح +عصير الليمونة ومنحركن لتتبل الحشوة منيح فيكم تدوقو الطعم لو ناقصها شوية ملح أو حمض بتعدلوها حسب الرغبة

منسكب الحشوة بصحن قدامنا ومنبدأ بلف الورق نفس طريقة اليبرأ بس هون منكتر الحشوة بقلب كل ورقة يعني منحط ملعقة أكل مليانة تقريباً وحسب حجم كل ورقة بتزيدو أو بتنقصوها شوي ومنلفو بالطريقة المعتادة

بالطنجرة يلي رح نطبخ فيها اليالنجي منحط شوية زيت زيتون وبعدا منصف شرحات البطاطا بسفل الطنجرة وبعدين منصف فوقها حبات اليالنجي ومنرتبن بشكل منيح جنب بعض حتى يتماسكو وما يفلتو على الطبخ

منتقلن بصحن أو أي شي المهم يحافظ على تماسكن لما نحطلن المرقة مايفوشو على الوجه

المرقة عبارة عن ماء ساخنة وملح وحمض ليمون وعصير ليمون منذوبن بالمي ومنضيفن على طنجرة اليالنجي ومنحطن على النار لحتى تبدأ تغلي منخفف النار على الآخر ومنتركن لحتى يستوو ممكن يحتاجو ساعتين أو تلاتة حسب نوعية ورق العنب

بعد مايستوي اليالنجي منتركو بطنجرتو لتهدا حرارتو شي ساعة وبعدين منصفي المرقة عنو ومنشيل حبات اليالنجي منصفن بصحن التقديم ومنزينهم بالبطاطا ومنقدمو وفيكم تحطو بالبراد شوي بعدين تقدموه لأن في ناس بتحبو بارد مع التبولة والبيتزا وهالأكلات هي وصحتين وعافية يارب🌷