للكيك : سبونج كيك ،، ست بيضات مفصول الصفار عن البياض ، كاسة سكر بودرة ، كاسة ونص طحين منخل مرتين ، ملعقة كبيرة بينكغ باودر، رشة ملح ، ملعقة كبيرة برش ليمون ، ملعقة صغيرة فانيلا ، كاسة الا ربع ماء باردة

بنخلط الصفار منيح بعدها بنزل عليه نص كاسه السكر البودرة تدريجي ومعلقة الفانيلا و ملعقة برش الليمون ، و بنضل نخلط ليفتح لون الصفار بعدها بنزل الماء عشكل صب متزامن مع الخلط ،، بعد هيك بنزل الطحين و البيكنغ باودر ورشة الملح عالصفار و بقلبه بهدوء يدويا بالمعلقة ، بضل اقلب لاتاكد انه كل الطحين داب منيح بالخليط

بعدها بخفق بياض البيض منيح ليصير قوامه كريمي يعني بده اربع لخمس دقايق خلط ، و بنزل عليه نص كاسه السكر الباقية تدريجي وبخلطها ، بعد هيك بضيف بياض البيض عالصفار بمعلقة تدريجي ، بضيف شوي و بقلب بهدوووء لنحافظ عالقوام الكريمي تاع البياض و هيك لتخلص الكمية

بعد هيك بحطها بقالب مبطن بورق الزبده من تحت و من الحواف و بدخلها فرن محمى قبل عدرجة ماء و تمنين بدها نص ساعة تقريبا ، بختبر استواءها بعود خشبي و بطلعها و بتركها تبرد تماما لاعرف اشتغل فيها..

بس تبرد بقسمها تلات اقسام ،، بمسك اول قسم بدهنه شوية كريمه من تحت و بحطه في قالب او صحن التقديم بعدها بشربه من فوق بعصير الفواكه و بدهنه شوية كريمه ،، بحط قطع الفواكه و فوقها طبقة كريمة كمية منيحه ، بعدها بحط طبقة الكيك التانيه و برد بكرر نفس الخطوات ، لتخلص الطبقات

بدهنها من برا بالكريما و بزينها من الحواف بجوز هند محمص ، ومن فوق تشكيله فواكه حسب الرغبة ، بس خلصت جبت نص كاسه قطر و حطيت ملعقة صغيرة ممسوحة جيلاتين و استنيت لتقل و مسك شوي و دهنت فيها الفواكه من فوق لتعطي لمعة و تحافظ على لونها

الحشو استخدمت الفواكه المعلبة و العصير اللي فيها هو اللي سقيت فيه الطبقات ، و جوز الهند بقلاية تيڤال قلبيه ليتغير لونه و يتحمص وزيني فيه ،، و صحة و هنا ❤🌸