هانذوب الخميره والسكر واللبن البودر في كوب ماء دافئ.

هاننخل الدقيق ونحط الملح على الدقيق وننزل بكوب المياه المذوب فيه السكر واللبن والخميره. ونضيف مياه على حسب الدقيق بتاعك. ونعجن كويس.

بعد ما تبقي عجينه ملمومه ومش بتلزق, نضيف الزيت ونعجن من تاني لغاية ما نلقيش الزيت باين فيها. هانسبها تختمر من ساعه لساعتين. ولو مستعجله دفي فرن البوتاجاز وحطيها فيه واطفي الفرن.

بعد ما اختمرت, هانقسمها لكور متساويه. وناخد اول كورة ونفردها على دقيق. في المرحله دي لو حابه تحشي السندوتش دا اي حشوه براحتك. ممكن تعمليلو حشوة بيتزا بس بدل صلصة البيتزا خليها كاتشب. وممكن كمان جبن اي نوع او فراخ شاورما او لحمه مفرومه بالبصل اي حشوه براحتك ولو عاوزها على كدا عادي.

سواء هاتحشي مش هاتحشي, بعد ماتفردي الكوره بتاعت العجين, هاتلفيها رول. وتقفليها من الجناب و الحته اللي من تحت برضو تقفليها. وتسيب الساندوتش وتاخدي اللي بعده لحتى نفاذ الكميه 😂.

تسيبهم يختمرو شويه, يعني مثلا ساعه, او تدفي الفرن وتحطيهم. وبعد ما يختمرو بقى, تجيبي طاسه فيها زيت وتسخني الزيت كويس على النار. وتحطي اول اتنين عملتيهم او تلاته على حسب مساحة الطاسه بتاعتك. بس الزيت مايبقاش غزير اوي. وتحطيهم بالترتيب من اول واحد عملتيه وهكذا.

لازم يطلعو على منديل ورق لازم علشان يشرب الزيت الباقي. هما من برا اكيد هايبقى فيهم زيت. انما من جوا اقسم بالله مافيهم نقطة وحده. وعن تجربه ولله ولله ولله هاتدعيلي ولله ماهايبقي فيهم نقطه وحده وهايكون خفيف وهش ولذيذ ولف هنا 😘😘😘😍.

بعد ماتحطيهم في الزيت, تهدي النار خالص وتغطيهم باي غطاء حله 😂 وبعد كدا تقلبيهم على الوجه التاني و ياخدو لون ذهبي. وطلعيهم واعملي الكميه كلها بالشكل دا.