بغسل الدجاج منيح بالمي والخل وبعدها بنسلقو وبنقيم الزفرة منو وبعدين بنضيف البهارات الصحيحة والبصل عليه وبنتركو يستوي لمدة ساعة تقريبا وبناخد الدجاج على جنب وبنصفي المرقة من البهارات

بنجيب جميد على شكل طابات بقطعو بالسكين قطع كبيرة وبغسلو بالمي منيح شي 5 مرات مشان تطلع الملوحة شوي وتروح اي شوائب منو

بعدها بنقعو بمرقة الدجاج المغلية لمدة نص ساعة تقريبا او ليدوب وبعد هيك بخلطو بالخﻻط الكهربائي ليصير سائل تماما وتروح كل الكتل الي فيه ..

بعدها بضيف الجميد على مرقة الدجاج المغلية وﻻزم تكون حرارة الجميد والمرقة وحدة انا سخنت الجميد بالاول على طنجرة على النار لصارت سخونتو بسخونة المرقة وضفت الجميد عى المرقة وبستمر بالتحريك لحتى يغلي الجميد .

طبعا مرقة الدجاج مابنضيفلها ملح بنوب بس ورق غار وهيل وقرنفل وقرفة .وبصل..

بنضيف للجميد الي عم يغلي معلقة سمنه وشوية من بهارات المنسف ورشة كركم صغيرة فقط وبنحط الدجاج عليه وبنتركهن يغلو شي ربع ساعة وصحة وهنا ...

عمل الرز
يغسل اﻻرز الابيض (صنوايت) منيح وبنقعو بماء بارد لمدة نص ساعة تماما وبكون ضايفة على ميه النقع معلقة صغيرة كركم ...

بعد ماينتقع بغسلو وبصفيه من ميتو منيح

بطنجرة بحط فيها معلقتين سمنه وشوية زيت بحط لوز مقطع مشان تزيين المنسف وبس يحمر لون اللوز بقيمو على جنب ..

بنفس الطنجرة الي فيها السمنة والزيت بحط الرز المنقوع وبضل احركو على النار بهدوء لياخد لون وريحة السمنه ...
شي 5 دقايق بضل بحرك الرز وبعدها بضيف الملح والمي والفلفل الاسود

كل كاسة رز متقوع ابيض بدو كاسة واقل من الربع بشوي مي مغليه

وبس يغلي الرز بخليه دقيقة على نار عاليه بعدها بوطيه على اﻻخر ليستوي
وبقدم المنسف مع الجميد وبزينو بالبقدونس واللوز وصحة وهنا

ملاحظة ممكن نحط خبز شراك بسدر الاكل وبنحط فوقو كبجايتين منسف ليتشرب شوي وبعدها بنضيف الرز والدجاج عليه وبتقدم مع اللوز والبقدونس وممكن مانحط خبز شراك يعني على حسب رغبة العيلة وصحة وهنا