نقشر البطاطا ثم نسكرفجوها و نشلوها مليح حتى يتنحالها النشاء و نتركها في الماء على الاقل ٤ ساعات.

من جهة اخرى نحضر المرق نضع بصلة تتقلى مليح ثم نضيف الدجاج والبهارات ونخلوهم يتقلاو ونضيف الملح الفلفل الاسود و البهارات و نمرق و نزيد الحمص ونخلوهم يطيبو حتى تتقال المرقة.

بعد ما نقطرو البطاطا المسكرفجة مليح من الماء نقلوها في زيت غازر ونحطوها في ورق اللي ينشف.

نضيف للبطاطا القلية معدنوس ثوم و نفس البهارات اللي طيبناهم في المرق و البيض لازم تجي جارية شوية.. نخلطوها مليه و نحطوها في صينية بها ورق الطهي نشكلوها مستطيل كيما الكايك رولي.

ندخلوها الفرن ١٨٠ درجة من التحت حتى تنشف و نحمروها شوية من الفوق

نخرجوها و نخلوها تبرد و نطلوها بالفرماج الطبيعي انا درت تاع الثوم يجي هايل و ندوروها بلعقل و نقسموها و نحطوها مع الصوص..