نجرسكو بالصلصة

هنولع الفرن نحميه على ما نجهز الصينية

هنخرط البصل ونقطع الفراخ والفلفل الاخضر والرومي مكعبات صغيرة

هنحط البصل لحد مايدبل مع ملعقة السمنة وننزل بالفراخ نقلبها كويس لحد ما لونها يغير كلها وبعدين نسيبها شوية على النار لحد ما الماء اللي هتنزل منها تبدأ تتشرب وبعدين ننزل بالفلفل والبهارات ونقلبها كويس ونسيبها دقيقتين على نار متوسطة مع التقليب

هنعمل البشاميل(بحب أعمله على البارد وبعدين أحطه على النار) هحط الدقيق والسمنة والزبدة والقشطة واللبن البودرة على بعض وأقلبهم بمضرب يدوي كويس لحد ما يدوبوا وبعدين هحطه على نار هادية مع استمرار التقليب عشان ميكلكعش لحد ما قوامه يبقى مناسب نشيله من على النار

هنجهز الصلصة ، نحط بصلة بنقطة زيت لحد ما تذبل وننزل بالطماطم المفرومة وعليها مكعب المرقة والبهارات ونسيبها تغلي لحد ما تبقى معجون والماية تنشف منها خالص

هنخلط ملعقة بشاميل مع الصلصة بعد ما تتشال من على النار وبعدين ننزل بالمعكرونة المسلوقة ونقلبها فيها كويس جداً

هنخلط ملعقة بشاميل على الفراخ

هنحط في الصينية طبقة معكرونة وبعدين طبقة الفراخ وبعدين طبقة معكرونة تانية وبعدين صوص البشاميل وعلى الوجه موزاريلا أو أي نوع جبن تحبوه وتدخل الفرن على درجة حرارة وسط وبألف هنا