هنجيب الممبار وننقعه في دقيق وخل وملح لمدة ساعه. وبعدين نقلبه ونقطعه.

نجيب ضهر السكينه وننظفه وبعدين نغسله تاني بالدقيق والخل والملح. ودي أصعب طريقة في الممبار في النضافه بتاعته.

نغسل الرز كويس ونقطع عليه الشبت والكزبره والبقدونس ونحط الملح بتاعنا والبهارات. ونحط عصير الطماطم على الخلطة وكده جهزنا الخلطه.

نجهز الصلصه, عصير طماطم وبصله كبيره مبشوره نشوحها مع ملعقة سمن او زيت على النار ونضيف عليها عصير الطماطم ومكعب مرقة دجاج لحد ما تتسبك.

نجيب الممبار ونحشيه ونحاول ما نملاش الممبار بالرز, عشان ما يتخرمش او يتفتح وهو بيتسلق.

نحط حلة كبيره فيها مياه ونقطع عليها بصله كبيره اربع تربع وطماطمايه كبيره اربع تربع ومكعب مرقة دجاج وكمون وبهارات وفلفل اسود وشوية ملح وورق لورا.

أول ما تغلي, نحط عليها الممبار كله ونتابعه لحد ما الجلد يذوب في يدك. وكده يبقى استوى.

نطلعه يبرد شويه. ونجيب طاسه, نحط فيها زيت اكل يسخن على النار ونحمر فيه الممبار. وبالهنا والشفا.