نبدأ على بركة الله، نحضر الخضر اللي نحتاجها نغسلها ونقيها، من جهة أخرى في طنجرة الضغط نحط القليل من الزيت واللحم والبصل مقطع شرائح رقيقة ونضيف التوابل (الملح، الفلفل الأسود، فلفلة حمرة، سكين جبيبر، الكركم) مع ملعقة كبيرة سمن ونقلي الكل جيدا.

نضيف الجزر مقطع طوليا نقلي ثم نضيف الطماطم المرابية نحرك مليح حتى يتقلى الكل جيدا ونمرق بالماء ساخن جدا ونغلق على الطنجرة ونخليها على نار متوسطة.

في هاذ الوقت نوجد الطعام (الكسكس) نغسل الطعام مليح بالماء بارد (لأن الطعام اللي استعملت مفتول باليد) نميل القصعة ونخليه يستقطر وينشف ينشف مليح مليح من الماء الزائد، كي ينشف نحتتو بين يدي ونزيد 2 ملاعق كبار زيت ندخل هاد الزيت مليح نعمر الكسكاس ونديرو يفور.

كي يفور نقلبو في القصعة نحلو ونرش بالماء نكون درت فيه الملح ونخليه يشرب. هاد العملية نقوم بيها 3 مرات في المرة الثالثة ندهنو بالدهان الحر.

كي يطيب اللحم تقريبا 80 % نحل على الطنجرة ونرمي الكابوية واللفت والكورجات ونعاود نغلق عليها حتى يكمل اللحم طيابو وطيب كذلك الخضرة.

كي طيب نرمي العقدة (في غرفية ندير شوية مرقة وعليها الطماطم المصبرة والكمون وتوابل الطعام نحلهم مليح ونعاود نفرغهم في الطنجرة) نخليها تقريبا 10 دقايق تعقد شوية ونطفي عليها.

وفي هاذ الوقت نكون فورت التفويرة الثالثة نحلها بين يدي ونبردها شوية نضيف دهان الحر (دهان لعرب) وإذا مكانش حاضر ندير سمن المرجان ندهنو مليح ونبردو.

نعمر الطبسي ونفرغ القليل من المرق في الوسط ونحط ساير داير الخضر وفي الأعلى قطعة اللحم.

قدمتو وبالصحة ولهنا😋👌🏻😋.