لازم تكونون دقيقين بخطوات الكشري واول شي راح نستخدم زيت قلي البصل بكل الاطباق اللي راح نسوي فيها مكونات الكشري

قلي البصل : نحط الفلح فوق البصل ونفرك ونوزع الملح بالبصل ونفكك البصل وتالي نضيف الطحين ونكرر العمليه ، ونقلي البصل لما يتكرمل ، نشيه ونخليه على جنب والزيت نستخدمه لباقي مكونات الكشري

فوح العدس : بجدر صغير نفوح العدس بالماء ونحط ملح وكمون فقط ، لمده ١٠ دق ولكن نخليه يستوي واهو محافظ على قوامه ، ونشخل العدس والماي نحتفظ فيه ضروري ضروري

تحميش العدس : نييب مقلاه ونحط زيت البصل ونحط ثوم ونشوحها. وتالي نضيف العدس ونحمس وتالي نضيف ملح وكمون ونحرك لمده دقيقه ونشيله ونحطه بطاسه او اي شي بس مانغطيه ونخليه يبرد وياخذ حراره المكان ومانغطيه

الدقوس او الصلصة الحمراء : نحط زيت البصل ونحط ثوم ونحمس وتالي نضيف حبتين فلفل اخضر مهروس وحمسته ، وتالي نضيف الطماطم المقطع ونخليه على نار عاليه حتى يذوب الطماطم وتالي نحط معجون الطماطم ونحمس وتالي ماء و نحط الملح والكمون والسكر ونذوق الطعم ولازم يكون طعم الكمون بارز ونخليه على النار حتى يتسبك.

المعكرونه : كميه الماء على حسب كميه المعكرونه لكن الماء نقسمه قسمين ، قسم ماء عدس وقسم ماء عادي ونحطهم بالتساوي مع بعض ، بالنسبه لي حطيت ربع كوب معكرونه وضفت كوب ونصف ماء عادي وكوب ونصف ماء العدس وخليتها لما تستوي وصفيتها ، وتالي بالجدر احط زيت البصل واحط المعكرونه واقلبها فيها واخليها على نار هاديه وتتسكر

العيش : نحط زيت البصل ونحط الشعيرية ونحمشها ولما تتغير لونها نحط العيش ونمزج الخليط ونحط الملح ونمزج وبعدين نحط كميه متساويه من ماء العادي وماء العدس ، انا احتجت ٤ اكواب ونوصفتهم وخليت العيش لما يستوي.

بخصوص الصلصة الصفره ماسويتها لان عيالي ماياكلونها بس طريقتها : كوب ماء و نصف كوب خل ابيض و ملعقة صغيرة ثوم مهروس و ملعقة صغيرة كمون و ملعقة صغيرة كزبره وكلهم لما يغلون اخر شي اضيف الملح

ياريت اي احد عنده معلومه يعدل ويجرب هالطبخه يقولي لاني سويتها واول مره وطلعت طيبه كثير ماشاء الله. وعليكم بالعافيه