اولا الكفتة.. ف حلة هنحط اللحمة و نقطع عليها البصل و التوم و البقدونس و التوابل و نضيف الرز و نقلب كل ده ف بعضه بايدينا بعد كده هنحطهم ف الكبة و يتفرموا كويس مع بعض و تبقى ناعمة و نقدر نشكلها بإيدينا..

بعد كده هنطلعها و نجيب صينية عشان نحط فيها ال هنشكله و نحط زيت ف ايدينا عشان الكفتة متلزقش فيها و نشكلها صوابع كده ولا تخينة ولا رفيعة زي الصورة (في ناس بتشكيلها كور بس الصوابع بتستوي احسن)

و فـ زيت غزير نسخنه و ننزل بالكفتة بتاعتنا تتحمر لحد م تبقى لونها بني فاتح كده (منحروقهاش)😅 و نطلعها..

بالنسبة للشوربة.. معلقتين زيت ف حلة و هنحط البصلة تدبل و نحط فصين التوم المفرومين و بعدين عصير الطماطم.. يغلوا غلوتين كده و تبتدي تبقى صلصة نضيف الشوربة و نشوف لو محتاجة ملح او فلفل و نسيبها تغلي مع بعض و بعدين نحط الكفته و ناخد بالنا عشان متتهريش يعني حوالي ١٠ دقايق كده تاخد كام غلوة و نطفي عليها بس و بألف هنا 💖