نضع الطحين والخميرة والحليب والملح والسكر في وعاء غميق ونخلط المكونات معا نضيف المنكه المرغوب(ماء ورد ،ماء زهر، فانيلا اي شي منحبو)

نخلط جميع المكونات ونغطيها وندعها لنصف ساعة تخمر في مكان دافئ😁😁 انا نسيت اصور لما كنت عم اشتغل صورتها بس لما خلصتا بكرا عندي عزيمة عملتا ليوم فيكي تخليها بالبراد لتاني يوم اطيب

هلق منجي للمفيد بعد ما تخمر وتطلع معك العجينة لازم تكون رخوة منخفقها كتير منيح لحد ما الخمر تاعها يروح وازا لاقيتيها شادة معك يعني متل قوام الكيك زيدي معلقتين ماء عادية ما لازم دافئ😉 ممكن تحتاج لحد ربع كوب ماء زيادة مو اكتر حسب نوع الطحين عندك

منجي للتحمير منجيب مقلى تيفال ما بيلزق منحط نقطين زيت نباتي ومنمسح المقلى بالمحرمة ومنحط الخليط يللي عنا بابريق ومنصير نحرك بالشوكة ونصب بالمقلي ما منلمسها لحتى ينشف وجها معنا عالاخر منكون مجهزين على جنب طينية كبيرة وحاطين فيها بشكير مطبخ ومنشيل من القلى منحط عالبشكير بتطلع معك اول شي من ورا قاسية شوي بعدين بتطرا لا تخافي

هلق بس تخلص الكمية معك بتتركيهن ليبردو عالاخر وبعدين فيكي تحطي الحشوة يللي بدك ياها قشطة او مكسرات او جبنة