الجينواز : في اناء نحط البيض و السكر و الفانيليا و رشة ملح و نبدا نخلط بالخلاط الكهربائي حتى يصبح لون الخليط ابيض نوعا ما و يتضاعف حجمة نبدا نضيف الفرينة على دفعات و نقلبها من الفوق لتحت غير بالعقل باه منحبطوش الخليط حتى نكمل الفرينة نتوقف.

نجيب 2 بلاطو ندهنم بالزبدة و نرشهم بالفرينة او نديرلهم ورق الطهي و نقسم الخليط على 2 و نفرغ في كل بلاطو نصف و ندخلهم يطيبو في فور نكونو شعلناه من قبل و نحطوهم في الوسط لما يتحمرو قليلا نطفي عليهم و نخليهم يبردو بعدها ندخلهم الثلاجة يبردو تماما حوالي 3 ساعات الى 6 ساعات.

لما يبردو الجينواز للاثنين نحيهم من البلاطو و نجيب بلاطو التقديم او سنيوة و نحط الجينواز و نجيب ورق او كرتون نكون رسمت فيه حرف k و قصيتوو و نحطو فوق الجينواز و نشكل الحرف بالموس و بعدها نحي الورق و نشربها بعصير الليمون و نخليها بجيه.

نحضر كريمة الشونتيي نحط 2 كاس,كبير بودرة مع كاس ماء بارد جدا مع اروم فراولة و نخلط بالخلاط الكهربائي جيدا حتى نتحصل على كريمة ثقيلة و لون وردي نتوقف.

نجيب كيس حلواني و قمع و نعمر فيه كريمة الشونتي و و نبدا نشكل في ورود فوق الجينواز لي شربناها بعدها نجيب حبة موز نقطعها الى دوائر رفيعة و نزين بيها.

بعدها ايضا الجينواز الثانية نشكل فيها حرف k و نجيبها و نحطها فوق الجينواز الثانية بلاما نضغط ونشربها بعصير الليمون و منكثروش باه ميهبطتش لتحت و يفسدلنا الورود لي عملناها.

في اناء ناشف نحط 200 غرام شكولاطة بيضاء و نضيفلها 2 ملاعق زيت و نحطو في اناء فيه قليل من الماء و نحطهم فوق النار لما تذوب الشكولاطة نضيف 2 علب ياوورت و نخلط جيدا و نحطها في الثلاجة تبرد تماما.

لما تبرد نطلي بيها الجينواز الثانية و نجيب ماتبقى من كريمة الشونتي و نحطها في كيس حلواني ونشكل ورود و نكمل كامل الكيكة بعدها نجيب حبة الموز الثانية و نقطعها دوائر و نزين بيها و نجيب شكولاطة ماكسو و نزين بيها ايضا.و يبقى التزيين اختياري.