نبدأ على بركة الله، نقي الخضرة اللي نحتاجها في هاذ الوصفة ونبشر كل من (الكوسا والبطاطا والجزر بالرقيق)، في طنجرة الضغط نفرغ 2 ملاعق زيت نخليها تسخن شوية نضيف عليها حبة بصلة مقطعة رقيق مع كرية من الشحمة متبلة ونقليها مليح حتى تذبال شوية.

نضيف الطماطم مصبرة ونخلطها مليح مليح.

ثم نضيف التوابل (الملح حسب الذوق، فلفلة حمرة، فلفل أسود، كركم، راس الحانوت وسكين جبير) نقلي التوابل شوية ونضيف الخضر اللي بشرتهم ما عدا حبة لفت صغيرة خليتها وافية بغيت غي البنة فقط قليت الخضر جيدا ثم ضفت الطماطم مرابية وخلطت الكل جيدا.

نقلي مليح ثم نضيف مركز الفلفل الأحمر الحار (لهريسة) حتى هي نقليها مليح دائما على نار هادئة.

نمرق الكل بالماء يكون ساخن جدا، نخليها تشد الغلية ثم نضيف لسان الطير (العصفور) نخلط الكل جيدا ونخليها طيب (تستوي) على خاطرها.

كي تقرب توجد نضيف عليها نص كعب مرق البقري والكمون مع قصبر ناشف ونحرك الكل جيدا.

في الأخير نضيف الملعقة كبيرة مزيج بين القصبر والمعدنوس مطحونين كانو عندي في المجمد ونخلط نخليها شوية تقريبا 5 دقائق نطفي عليها

قدّمتها مع بيتزا كاري ولا أروع😋👌🏻😋.

وشهية طيبة للجميع🥰🌷🥰