نبدا أولا بالحشو باش يبرد مليح، في مقلاة ندير شوية زيت يسخن نضيف عليها البصل نخليه يذبال شوية نزيد عليه الثوم المرابي نخليه حتى هو يتقلى مليح ثم نضيف الفلفل الأخضر مقطع قطع صغيرة نحرك مليح ونخليها تتشحر.

ثم نضيف اللحم المفروم نحرك الكل مليح ونزيد الطماطم المصبرة والتوابل (الملح، الفلفل الأسود، الفلفل الأحمر، الكركم، سكين جبير، القصبر ناشف، الثوم بودرة) نحرك الكل ونخليها طيب على خاطرها.

من بعد نضيف القليل من السلق والقليل من المعدنوس مفروم نضيف في الأخير قطعة من الجبن الطري طارتينو.

نحل الجبن مليح في الحشو حتى تنسجم كل المكونات طفيت عليها وفرغتها في طبسي ضفت عليها صلصة الباربيكيو هاذ المرحلة إختيارية وخليتها تبرد بجيه.

في هاد الوقت نحضر العجينة، نخلط جميع مكونات العجينة ونلمها بالحليب دافي دات معايا كاس وربع ومن بعد نضيف الزبدة (أو المرغرين) تكون طرية.

ندخلها مليح ونعجنها حتى تولي ملساء نغطيها ببلاستيك غذائي ومن فوق بسربيتة ونخليها تختمر.

بعد ما تخمر العجينة نديقازيها ونقطعلها إلى قطع تقريبا متساوية عطاتني 7 كرات، نغطيهم ببلاستيك غذائي باش ما يديروش القشرة الفقانية وإذا كان الحال سخون بزاف نحطهم في صينية وندخلهم للثلاجة ونجبد بالوحدة.

ونبدا نحل الأولى بمساعدة الفرينة ونحط الحشو في الطرف ونزيد فوقو الجبن المبشور حسب المتوفر، نمسحها صاير داير بالماء نطويها ونغلقها بالفرشيطة اللي نكملها نحطها طيب مباشرة.

نحط الطاجين الحديد الثقيل يسخن مليح ونقص عليه شوية ندهن شوية زبدة ونحط الفطيرة طيب كي طيب من تحت ندهنها دهنة خفيفة بالزبدة ونبيكيها بعود الشواء باش ما تنتفخش ونعاود نقلبها.

نطيبها من كل الجهات من الأحسن تقدم سخونة.

وشهية طيبة 😋🥰