نضع أطراف الدجاج في قدر أو كوكوط نضيف البصل مقطع الطماطم المرحية والثوم والزيت طبعاً وباقي التوابل ونتركهارتتغلى شوي

بعدها نضيف الخضر اولا البطاطا والجزر ونخلط ونتركهم يتغلاو جيداً بعدها نسكب الماء نكون مسخناتوا

بعد الغليان الأولي نضيف الحمص وجريوات ونتركها تتغلى للمرة الثانية حتى تطهو

في الأخير نضيف الفلفل الحار للتنكيه بأن يترك رائحة الحرور

بالنسبة للبربوشة نغسلها مرة وزوج بعدها نضعها في كسكاس حتى تقطر

نسخن الماء في برمة من جهة ونكون فرغنا البربوشة في قصعة وحليناها مع إضافة قطرة زيت حتى لا تلتصق أثناء التفوار

نضعها تفور حتى تشوفي الفوار خرج منها بعدها نحي الكسكاس ونشمخها بالماء بارد طبعاً حتى تشوفيه خرج من تحت الكسكاس ونتركها تقطر للمرة الثانيه (وكاين لي يشمخها في القصعة)

في الأخير نزيد نحلها ونذر ليها شوي ملح ونفتلها ما بين اليدين ونفرغها في الكسكاس تفور للمرة الأخيرة

ملاحظة : كاين لي يفور البربوشة على المرق مباشرة لكسب نكهة المرق فيها أثناء التفوار

ملاحظة : بالنسبة للخضار كل واحد واش متوفر عنده مثل الخردل (اللفت) /الفول/الكرنب/الخرشف كلها تصلح للطهو مع البربوشة الدجاج او اللحم كل واحد ومقدوره غير مقيد بالعدد