اول حاجة نحضروها القاناج في كسرونة نحط الكريمة السائلة تسخن لدرجة الغليان ثم نطفي عليها و نضيفلها كمية الشوكولا و نخلط حتى تذوب و تنسجم مع الخليط نغطيها بكيس بلاستيكي(لازم يلامس الخليط) و ندخلها للثلاجة ليلة كاملة يصبح شكلها كيما آخر صورة ،و ليلة من قبل نحضر ايضا الجينواز لانو لازم تبات قبل ما نقطهعا و نحضر السيرو (نحط السكر و الماء و شريحة الليمون فوق نار بعد ما يغليو نحسب 10د و نطفي)

بعد ما تفوت ليلة على الجينواز و القاناج نوجد اولا الكريمة بخفق بودرة الشونتي و الحليب و القليل من الملون الاحمر(باه يعطينا لون وردي فاتح) حتى نتحصل على كريمة متماسكة نجيب الجينواز و نقسمها على4 طبقات

نجيب الطبقة الاولى و نشربها بالسيرو ثم نضيفلها كمية من القاناج و قطع موز ثم نضيفلها الطبقة الثانية من الجينواز و نشربها و نضيفلها القاناج و الجوز مهرمش و هكذا حتى نكمل كامل الطبقات مرة بالموز و مرة بالجوز (الخطوة هذي اختيارية و لكن تمد بنة و مذاق خطيير للكيكة)

بعد ما نكمل كامل الطبقات نجيب الكريمة و نبدا نغلف فيها نحط الطبقة الاولى و نسويها جيدا و ندخلها للثلاجة نصف ساعة و نيد نخرجها و نضيفلها الطبقة تانية و نحاول نليسيها جيدا

و التزيين الاخير يبقى اختياري و حسب الموجود انا زينتها على الاطراف بالشوكولا و رسومات ايلسا و آنا (حسب طلب بنتي اكيد 🥴) و حبيبات من الشوكولا و بالصحة و الراحة ☺