هنجيب طاجن او اي حاجة تدخل الفرن.. وهنحط المولتو🥐🥐🥐 على حسب ماياخد الطاجن.. انا جبت ليا لوحدي من غير جوزي 😈😈😅

هنضيف اللبن المغلي لحد لما يادوب يغطي المولتو وبلاش تكتروا.. ولو عايزين تحطوا سكر دوبوه الأول في اللبن وبعد كده ضيفوه... واضغطوا عليه اضغطوا عليه لحد لما يعترف 😂 قصدي عشان يتشرب ويدخل جوة المولتو..🥐 كده خلاص لو عايزين تاكلوه علطول على كده اول مايتشرب باللبن

وبعد كده جيبت شيكولاتة سايحة ونايحة بجنيه.... صرفت كتير جدا 😂شوفتوا لما قصيتها بقيت قزمة وقصيرة ازاي😂.. الشيكولاتة قليلة جدا وبقيت كأنها بعشر قروش😂 الناس مابقاش عندها ضمير 😆

وبعد كده حطيتها في الطاجن وفضلت افردها على قد ماقدر وهو الطاجن سخن.. عشان تسيح بسرعة

حاولت افردها على قد مااقدر لكن للأسف تقيلة قوي.. كانت عايزة نشابة او عصايا نفردها بيها 😂😂وعايزة اقولكوا الشيكولاتة اللي اسمها بيلا بيلا بالومبيلا دى😂 طلعت طعمها استغفر الله العظيم😣.. ياريتني كنت اكلتها وهي قرعة كده من غير شيكولاتة😁.. الشيكولاتة التانية اللي، اسمها شيكسوا ارحم..او صوص شيكولاتة او تسيحي مكعب شيكولاتة هيبقى اجمل واجمل او ماتحطيش خالص او ماتعملش الطريقة كلها 😂🤣

وبعد كده اسكت🤐 لاا لسة.. 😂 حطيت سوداني مجروش وزينتها ببسكوتاية مقرمشة أوريو 😄💪

ودي شكلها النهائي.. وشكلها من جوة. طرية كده وملظلظة😅 وطعمها تحفة حتى لو حطيتي مولتو ولبن هتبقى حلوة.. بس جربوها ومش هتندموا 💪💪