اول حاجة نديرها نوجد العجينة مثل عجينة المسمن ونشكلها كريات ندهنها بالزيت ونغطيها بكيس بلاستيك ونتركها جانبا

الخطوة الثانية نرحي الشحم في رحاية الكاوكاو لانو الشحم يكون ناشف راح يترحا بسهولة

نرحي ايضا حبة البصل مع الفلفلة ونضيفها للخليط اما الثوم فأنا نحب ندڨو في المهراز احسن يبقى محافظ على النكهة

نضيف البهارات والثوم المهروس والطماطم والهريسة او الفلفل الحار ان وجد والمعدنوس والقصبر والملح وندخل كل المكونات مع بعض باستعمال يد المهراز ههه

الخطوة الثالثة: نفتح كرة من العجين بواسطة الزيت ونضع فوقها القليل من الحشو في الوسط ونغلق كما هو موضح بالصور حتى نتحصل على الشكل الدائري

بعد ذلك نفتح كرية اخرى نضع بداخلها الدائرة المتحصل عليها

بعد ان نتحصل على الشكل المطلوب نخبزها قليلا حتى نتحصل على دائرة كبيرة

نضعها فوق طاجين ساخن ونقلبها من الجهتين حتى تتحمر

وبالصحة والهنا مممم ولا اروووع

التدبيرة: بلاك بزاف بنات يعرفوها بصح كاين تان الي ما تعرفهاش الي ما عندهاش طابونة وطيب فوق الكويزينيار وما عندهاش بابي المنيوم تفرغ زوج كيسان ماء ولا ثلاثة فوق الكويزينيار باش ما يتحرقش من الطاجين.انا عندي طابونة وعجزت لا نجبدها هههه

الشاربات: راكم عارفين مع المخلع ما ينفع غير حاجة تنحي ليدام والتخمة ههه المهم : درت 3حبات قارص مع لتر وربع ماء ونصف فنجان ماء زهر و6 ملاعق حليب عادي وكاس سكر وملعقة صغيرة فانيليا ودرتهم في الميكسور وصفيتهم مليح بالصفاية

من بعد درتو في إناء وزدتلو شريحتي ليمون واوراق نعناع ودرتو في الكونجيلاتور يبرد ويطلق والله ضاقوه ناس داري قالولي خير من تاع برا طولت عليكم ان شاء الله يعجبوكم وإلى الملتقى بإذن الله