للى بتخاف من الخبز والبنات الصغيرين واللى بتتعلم مطبخ جديداحب اقولك الخبيز أحلى حاجة في الدنيا بس لازم تفهمى الكيمياء بتاعة كل صنف وكيمياء الدقيق

ببساطة لو هتعملى عيش وبيتزا وسندوتشات هتشترى دقيق قوى علشان فيه بروتين اسمه جلوتين هو ده اللي عاوزينه وهو اللي بيخلى قلب العيش عامل زي السفنج

انا جايبة هنا كيلو دقيق وتسألى عن نوع خميرة كويسة تجيبى اللي في الباكتات الكبيرة وتشيليها عندك في مكان مغلق مش واصلها نور في درفة المطبخ مثلا وتاخدى منها طول السنة اهم حاجة تجيبيها من عند عطار مثلا يكون بيبيع كويس ومفيش حاجة بتركن عنده

وهتحطى ملعقة صغيرة ملح ومعلقتين كبار سكر

لو هتحطى زبدة يبقى هتقللى السوائل لأن الزبدة فيها سوائل فهتحسى أن عجينتك لزقة وهتضطرى تحطى فيها دقيق فأنتى هتقللى السوائل في حالة الزبدة يبقى بعد ماتحطى السوائل بتاعتك هتحطى الزبدة متقطعة قطع صغيرة وتفضلى اعجنى ودخلى الزبدة جوة العجينة لحد ما القطع تختفى

هتلاحظى وانتى بتعجنى أن العجينة جواها شبكة فعلا ده معانا أن ظقيقك قوى والجلوتين اشتغل انا بصورلكم كل خمس دقائق علشان تلاحظوا الفرق

هتسيبيها ترتاح وحاولى تغطيها بالبلاستيك الشفاف احسن من الفوطة العادية علشان ليحافظ على الترطيب بتاع العجينة

لحد كده لو هتعمليها ثاني يوم حطيها عادي في الثلاجة بتبقى وهم والغريبة انك هتلاقيها بتخمر برده وحجمها زايد كأنها برة عادي جداً بس لو هتحطيها في الفريزر يبقى تحطيها مباشرة بعد ما تعجنيها قبل ما تختمر يعنى

كده هي خمرت شايفين الفرق ده علشان الخميرة حلوة والعجينة في مكان دافئ

هي كده جاهزة اعملى بيها بيتزا أو سندوتشات بس انا للأسف مكنش عندي جبنة كفاية للبيتزا

في ملحوظة قولت اقولكم عليها فادتنى اوي اوي احنا في البيت بنتوصى بالبيتزا وبنزود التوبنج فده بيعمل تقل على العجينة وبيخليها معجنة فأنا بدهنها بالصلصة وادخلها فرن ١٨٠ وده بياخد نص ساعة اما لو فرن ٢٠٠هتاخد من ١٥او١٠دقايق المهم انها هتستوى وهتطلع تأخذ التوبنج ودخليها الجبنة تسيح وطلعيها بالهنا والشفا

بالمناسبة الكيلو عملى ٣بيتزات كبار بمعنى الكلمة وعملى ٢٧سندوتش كيزر حلو ويملى العين