أولا نحط السميد قرصة ملح و رشة قرفة و نجيب كيلة سمن ناقصة اصبع نكملها زبدة ذائبة لازم يكونوا باردين بدرجة حرارة المطبخ و نبسسوا ملييح حتى نحسوا السميد و السمن دخلوا في بعضاهم غاية نخلوهم ليلة كاملة

في الصباح جبت كيلة نصف ماء زهر و كملتها بالماء العادي وبديت نفتل فيه يعني ما تعجنوش انا ضفت فوق الكيلة نصف كيلة وحد اخرى حتى نحسوه بدا ينطم باش نشكلوه حربوش نخلوه ونروحوا نحضروا الحشو

كان جابلي الزوج تمر معروك بيه بالعلفة بكلشي فورتوا وحد نصف ساعة حتى تحسوه بدا يتعجن نحيتوا خليتوا برد شوية نقيتوا من بعد ضفتلوا الزبدة والقرنفل والقرفة وعركتوا مليح بعدها ضفت الزيت

نجيب عجينة المقروط نشكلوا حربوش في نفس الوقت نشكل حربوش من التمر و نحلها شوية فالوسط و نحط حربوش التمر و نغلق عليه ونعدلوا كامل هذاك الحربوش حتى يصبح مغلوق من كل الجوانب سمحولي ما صورتش المراحل بعدها نقطع بسكين مقروطات ونخليهم يرتاحوا ينشفو شوية نكمل المقروط تاعي بعدها نجيب مقلاة ونعمرها بالزيت مليح ونحط في جهة إناء فيه العسل باش نغسل مباشرة وشهية طيبة⁦❤️⁩