أول حاجة هنجيب مقلاية من اللى مبتلزقش ونحط فيها معلقتين اللبن البودرة ونقلبهم لحد ما ياخدوا لون دهبى

فى بولة هنفضى كيس البسبوسة وعليه اللبن البودرة ومعلقة صغيرة من البيكنج بودر ونقلبهم فى بعض.

هنجيب السمنة السايحة ونحطها ع الخليط اللى معانا ونقلب بإيدينا كويس لحد ما السمنة تدخل فى الخليط كله.

هنضيف على الخليط علبة الزبادى واللبن الدافى ونلم الخليط بيهم.

نجيب صنية وندهنها سمنة وننزل بالخليط براحة ونبل إيدينا مية ونفرده ونخبطها على الرخامة كام خبطة، وممكن نحط عليها من فوق فول سودانى وندخلها فرن سخن لحد ما الجوانب تحمر وبعدين نشغل الشواية تاخد لون.

أول ما نخرجها نحط عليها الشربات السخن، ونسيبها تهدي ونقدمها وممكن نحط على وشها قشطة ومكسرات.

طريقة عمل الشربات.. هنحط فى حلة كوبايتين مية وكوبايتين سكر، ونحطهم على النار ونسيبهم لحد ما المية تغلى، وبمجرد ما المية تغلى نعصر عليهم عصرة لمونة، وبعدين نسيب الخليط كام دقيقة على نار هادية، وبعدين نطفى عليه ونضيف نقطتين ڤانيليا سايلة، ونشيل الريم اللى متكون ع الوش وكدا يكون جاهز.