اولا نسلق الكرنبه ورقه ورقه او كامله وبعد كده بنعملها ورقه الكرنب ناخد واحده ونشيل الجزء الناشف اللي في النص ونعملها رول ونقطعها علي حسب الحجم اللي احنا بنحبه بس اهم حاجه يكون كل التقطيع قد بعض في الطول عشان يبقي شكله حلو

وعشان نعمل التسبيكه هنحط الزيت والسمن علي النار ونضع عليهم البصل وبعد ما البصل يدبل نضع عليه الصلصله وبنقلب وبعد كده نضيف عصير الطماطم والسكر والتوابل ونتركها علي نار هادئه تتسبك

وبعد ماتتسبك وتبرد هنضع باقي المكونات الارز والخضره والبصله والزيت وبعد كده هنلف ورق الكرنب ونضعه في الحله ونسقيه شوربه بط او لحم وبيبقي علي نار عاليه واول مايغلي بنقلل درجه الحراره عشان يستوي وبألف هنا مقدما ❤️

ملاحظات: في قعر الحله نضع الجزء العلوي م̷ـــِْن الشبت والكزبره اللي هي السيقان ونضع طبقه من ورق الكرنب نفرده في القعر. نضع الشوربه فوق المحشي عند السطر اللي قبل الاخير. نضع طبق عشان المحشي مايفكش. لازم يكون جمب بعد بس مش مضغوط عليه اووي عشان ميطلعش رز. مش بضيف بقدونس علي خلطه محشي الكرنب عشان بيضيع طعم الكرنب