العجينة اخلطي كل المكونات مع بعضها البعض واعجنيها شوي خليها ترتاح 15د في الثلاجة هاذا المرحلة عادي ساهلة المرحلة الصعيبة في التوريق

كي ترتاح اقسميها على 26دائرة 13لتحت و13لفوق كي تشوفيها هاذيك الدائرة ڨدماه صغيرة تخلعي منها نورمال شوفي واش ديري جيبي كمية كبيرة وحطيها علا جنب جيبي قنوط ولا حلال كل واحد واش يسميه رشي النشا ملييح وحلي 13هاذوك قيس دائرة متوسط كي تحلي لازم تغطي لايبس مستحيل تتحللك العجينة وتكون رقيقة كيما ورق شفاف ولاقل ومبعد لازم ديري النشا بزااف لا يلسق جيبيهم كامل وحطيهم فوق بعضاهم ولازم ديري طبقة رقيقة تاع النشا بين كل دائرة ولازم الدوائر يكونو نفس الحجم وخليهم بلاعقل حتا توصل لعجينة لقيس لبلاطو نتاعك

لازم البلاطو يكون متوسط ولازم العجينة ماتتقطعش ومبعد شتي العجينة لي حليتيها هزي بلاعقل هاذيك الورقة وديرها في البلاطو بدون دهن حتا تكملي كامل الاوراق واعدليهم ملييح تقدري ديري لڨرون وتحليهم وتحطيهم لداخل انا درتهم مارميتهمش جيبي الكاوكاو حطيه اعدليه ملييح وماتضغطيش بزااف ومبعد عاودي نفس الخطوات ل 13لي بقاولك وحطي ورقة بورقة بدون دهن حتا تخلصي ومبعد ڨصيه مربعات ولا كيما تحبي بلاعقل سياسي علبهم وجيبي خليط المارغارين حميه كامل من الفوق بالتساوي مش جبهة معلبة وجيها فارغة تحير تڨولي كفاه رح يجي مورق

وانا مادهنتش بيناتهم نڨولك حبيبتي ماتخافيش راني شاركتك كلشي بالتفصيل ومبعد حطي الكاوكاو واعدليه ماتزيديلو والو لاسكر لاعثمان عليوات والو خليه هكاك باه في الفرن يطلعو الورقات وما يجيش معجن

كي طلي علا الفرن تاعك تلڨايها بدأت تطلع اعرفي بلي نجحت العجينة

الشاربات في كيكوطة ولا طاوة كبيرة لوحي كلش وخليه يطيب مليييح حوالي 45د على نار متوسطة كفاه تعرفيه بلي ثقال اجبدي نصف فنجان وبرديه ازا جاك هما خفيف شوي علا لعسل صاي طفيلو وإذا ماء خليه يزيد

نروحو للفرن لازم دائما يكون مشعل مسبقاً نار هادئة الى متوسط باه يطيبو الورقات لي في النص مدة الطياب تطول شوي وعلا حساب فرن تاعك المهم عسيها كي يبداو الجوانب يديو اللون الذهبي إلى الأحمر شعلي الفرن من الفوق ونقسيلو باه حتا الطبقات تاع الفوق يطيبو حمريه لون خفيف واجبديه هكاك سخون ازربي لوحي الشاربات حوالي ساعة زينيها وتاكليها بالصحة والهنا 🤗♥️😘

ملاحظة هامة جداا بخصوص العجينة لازم تتغطا لا تيبس سوا كي تحطيها في فريجيدار ولا كي تكعبريها وتحليها

نصيحة هامة اذا مادرتيش بزاف نشاء رح تلسقلك وإذا كثرتي بزااف نشا رح كي تحليه بزاف مع العجين رقيق بزاااف وحساس رح يتشقق و تتڨطع الورقة وإذا جاتك مليحة بصح فيها شوي نشا انفضيها بلاعقل لازم يدك تبان والورقة تكون شفافة مش فيها كيلو نشا هههه

اعدلي ورقاتك مليح سيرتو الأول تاع الوجه انا جاتني شوي شوي كاعاد المرة الأولى وزيد من التعب

لي جربتها تردلي بالخبر وتفرحني وتدعيلي دعوة خير هاذا ماكان ♥️