સૌથી પહેલા ચાસણી બનાવીશું. તે માટે એક કઢાઇમાં ખાંડ અને પાણી મિક્સ કરી ગરમ મૂકવું. બધી ખાંડ ઓગળીને ઊકળે તે પછી 4-5 મિનિટ ઉકાળવી. એક તારની ચાસણી બનાવવાની છે. થવા આવે ત્યારે તેમાં કેસર અને ઇલાયચી પાઉડર ઉમેરવો. તેને ગેસ પરથી ઉતારી બાજુમાં રાખવી.

મેં અહીં દૂધમાંથી તાજુ પનીર બનાવી વાપર્યું છે. તે માટે દૂધને ગરમ મૂકી ઉભરો આવે એટલે ગેસ બંધ કરી 2-3 મિનિટ ઠંડું થવા દેવું. ગાળેલા લીંબુના રસમાં તેટલું બીજું પાણી ઉમેરી તેને 1-1 ચમચી દૂધમાં ઉમેરતા જઇ હલાવતા જવું. પનીર અને પાણી અલગ પડે ત્યાં સુધી કરવું. પછી તરત જ પનીરને કપડાં માં લઇ પાણી ગાળી લઇ 1-2 વાર ઠંડા પાણીથી ધોઇ લેવું. બને તેટલું પાણી કાઢી લેવું. એક પ્લેટમાં માવો અને પનીર મસળીને લેવું. 125-150 ગ્રામ જેટલું પનીર બનશે.

કાજુ અને બદામને શેકીને ઝીણા ટુકડા માં સમારી લેવા.

માવા-પનીરના મિશ્રણમાં મેંદો, સોજી, દળેલી ખાંડ, બેકિંગ પાઉડર અને ઇલાયચી પાઉડર નાખી હાથથી મસળવું. કડક પડે તો બહુ જ થોડું દૂધ ઉમેરવું. ઢીલું પડે તો 1-1 ચમચી કરીને મેંદો ઉમેરવો.મારે આ માપથી પરફેક્ટ લોટ બંધાયો હતો. લોટના 4 ભાગ કરી એક ભાગ અલગ લેવો. દળેલી ખાંડ થી પડ સારી રીતે કડક અને ડાર્ક બનશે.

કાઢેલા ચોથા ભાગમાં કેસરી કલર અને ચોપ ડ્રાયફ્રૂટ નાખી મિક્સ કરી લેવું.

આ કેસરી ભાગમાંથી 25-30 નાના બોલ્સ બનાવવા. બાકીના લોટના તેટલા જ ભાગ કરી દરેક ભાગમાં કેસરી બોલ સ્ટફ્ડ કરી ગોળા બનાવવા.

બધા ગોળા ને આ રીતે વાળી લેવા. હવે ઘી કે તેલ ગરમ મૂકવું. એકદમ ધીમા તાપે લગભગ કાળા થાય ત્યાં સુધી આ ગોળાને તળવા.

જે ગોળા તળાય તેને કાઢીને 2-3 મિનિટમાં ચાસણીમાં ઉમેરતા જવું. બધા કાલાજામુન ચાસણીમાં ઉમેરી 3-4 કલાક માટે રાખવા. જો પ્રોપર ચાસણી બની હશે તો જામુનમાં પરફેક્ટ ઉતરી જશે.

કાલાજામુન તૈયાર છે. તેને ફ્રીઝમાં 6-7 દિવસ સુધી રાખી શકાય છે.